Semi-final ngaihven hlawha intum tur Swiatek vs Sabalenka

Semi-final ngaihven hlawha intum tur
Swiatek vs Sabalenka
Thawhlehni khan quarter-final match-a an tumpui ve ve hnehin champion lai Iga Swiatek leh world number one Aryna Sabalenka-te’n French Open last four an lut ve ve a, champion tura rinkai lian pahnihte hian final luh an inchuh zui dawn a ni.
Roland Garros title hnuhnung panga zinga pali hui fai vektu Swiatek hian semi-final lut turin Elena Rybakina lakah 6-1, 7-5 hnehna changin, final luh inchuh match-a a tum leh tur Belarusian chungchang a sawichhuak nghal a, “Aryna hmachhawn hi chu englai pawhin chona a tling a, eng leilungah pawh a khel thiam vek a, season ropui tak hmang mek a nih avangin rim taka ka beih a a ngai dawn a, ka huaisen hle pawh a ngai ang.
“Dawt ka sawi lo, inkhel hautak zet a ni dawn, mahse, he chona hian min tihlim em em a ni,” a ti.
Pole hi French Open bika match 26 chak zawn mek niin, kum 2020 khan a vawikhatna atan Roland Garros-ah hian a champion a, kum 2022-24 chhung khan vawi thum champion lehin, Thawhlehnia Philipp Chatrier stadium-a a inlan tum pawh khan defending champion niawm rengin set khatna chu awlsam zetin a la mai a, mahse, set hnihnaah Ukrainian a rawn khel tha ta tlat a, harsa takin Swiatek khan set hnihna a la thei hram a ni.
Kum 24-a upa Swiatek hi thla hmasa mai khan doping chungchang avangin thla khat inkhel thei loa hrem a ni a, a chunga hremna an lekkawh pawh kha khingbuai loin a pawm hmiah a; hremna a tawrh tlingtlak zawh rualin Paris-ah a title kawl lai humhim tumin a inlan zui a, tuntum hian a champion leh thei a nih ngai chuan kum 1968-a professional era an tan hnuah hmeichhe zinga Paris khawpuia major title vawi li la zawn tling thei hmasaber a ni ang.
French Open a khelh hmain three-time defending champion Poland nula hian kuminah eng title mah a la sualchhuak lo a, mahse, heti chung hian Paris claycourt tournament kal mekah chuan pui takin a inlan kal leh mek a, amah pawhin phurna leh thathona a neih thin ang ngai chiah kha amahah a tho leh tawh tih a sawichhuak nghe nghe.
Quarter-final inkhel dangah nikum Paris Olympic tennis hmeichhe champion Zheng Qinwen chuan Olympic gold medal a awrhna khelmual Roland Garros-ah Aryna Sabalenka a ngam ta ngang lo a, kum 2023 ang bawkin Belarusian hian French Open semi-final a lut leh ta phawt.
Sabalenka hian Court Phillippe Chatrier-ah Chinese nu tawhkhirh ve zet Qinwen chu set khatnaah a chai hlei thei bik lo a, harsa taka set la hramin, set hnihna erawh a awlsam ta zuih a, 7-6 (7-3) 6-3 hnehna nen last-four lutin, nikum October thlaa world number one nihna a chhuhsak fifth-ranked Swiatek lakah fiahna hautak zawk a hmachhawn dawn.
Sabalenka leh Swiatek hi tunhma lamin tum 12 an lo inhmachhawn tawh a, tah chuan head-to-head record-ah Pole chungnung zawkin vawi riat a chak a, Belarusian chu vawi li a chak ve thung.
Heti zat zet hi khelmual chhungah lo intawng tawh mah se 2022 US Open semi-final hnu lamah khan major tournament bikah an insu leh ta ngai lo a, kumin hian Roland Garros title pali hawn tawh Swiatek leh Paris trophy la sualchhuak ve ngai lo Sabalenka-te’n final luh an inchuh dawn a, final tluk thaw thanga ngaihven hlawh a ni lo thei lo!
Nimin French Open hmeichhe singles quarter-final match pakhatah world number 361 Lois Boisson chuan lasi thawnthu ang maia a kal tluang lai chhunzawmin sixth seed Mirra Andreeva lakah straight-set hnehna a sualchhuak leh tawh!
Wildcard hmanga main draw lama intatlut tualchhung nula Boisson hian Court Philippe Chatrier lamah 7-6 (8-6) 6-3-a Russian hnehin, a tumkhatna’na Roland Garros semi-final a luhna kawngah seed luah pha thiau pathum a paltlang ta!
Tun hi he Frenchwoman tan Grand Slam main draw a luh vawi khatna niin, nikum pawh khan wildcard hmang bawka Roland Garros inelna hmachhawn tur a nih laiin French Open tan hma chawlhkar khat chiah awm tawhah khup hliam buaithlak chi anterior cruciate ligament injury avangin a inhnukdawk a, mahse, thla 12 hnu lekah wildcard ni chunga Open era bika French Open women’s singles semi-final lut thei hmasaber niin, kum 2011 hnu lamah Marion Bartoli hnua he tournament-a French semi-finalist hmasaber a ni nghal bawk.
Last four match pakhat zawkah Boisson hian world number two Coco Gauff a hmachhawn dawn a; semi-final a luhna kawngah American Gauff hian nimin vek khan 6-7 (6-8) 6-4 6-1-in a chipui Madison Keys a hneh a ni.