Usain Bolt te hi chu khawvelin a theihna hi an hriatpui maia, tlan chak hming thang a ni a, a hming lemah pawh ‘Lightning Bolt’ an tih hial a ni. 2009 atang khan meter 100 tlan thleng rang thei ber record siamtu a la ni ta ngar ngar a, second 9.58 chhungin a tlan thleng hman. Chutiang karah Usain Bolt te anga tlan chak ni lo, mahse, thluak chak ngai fahran mai te hi khawvelin a hre lar leh vak mang lo zawk tlat thin. Irbid, Jordan a cheng Mohammad Sayaheen pawh chu chutiang zinga mi chu a ni. Ani hi chu pa thluak chak fahran mai a ni ve thung a, miin thu an sawiin, an thusawi sentence khat an sawi zawh rual deuhthawin chu sentence-a hawrawp awm zat chu a lo belhchhuak hman daih zel!
Amah chu kum 51 a ni tawh a, sentence 10 a hawrawp awm zat second 35.5 chhungin a ngaihtuahna chauh hmangin a belh chuak hman. A tihdan pangngaiah chuan second hnih khat lek chhungin sentence khata hawrawp awm zat hi a belhchhuak hman a, mahse, Guinness World Record hian record siam tur chuan sentence tin chu a ri-a a chhiar chhuah hmasak vek phawt an phut a, thil chhiar chak dan a zirin hei hian a hun hman a titam ta zawk a ni. Sentence 10 chu second 35.5 chhunga chhiar zoin, a hawrawp awm zat pawh a belhchhuak vek hman a ni.
Mohammad hian a thiam thil hi 1988 khan a hrechhuak daih tawh a, kum 11 kalta khan pan-Arab talent show Arabs Got Talent-ah te pawh a lo inlan tawh a, chutah pawh chuan judge-te mak tih khawpin a belh rang a ni. Mohammad chuan, “Secondary school ka kal laiin tihpalh thil tak meuhin ka thiam thil hi ka hrechhuak a. A tirah chuan naupang dangte pawhin an tithei ve vek turah ka lo ngai a. Mahse, kan math zirtirtuin ka theihna chu min hriat chhuah sakin, min hrilh hnuah ka hrethiam ve chauh a ni,” a ti.
Sentence khata hawrawp awm zat belhchhuak rang thei ber
