Serchhip MHIP chuan Mizo hnam chimral kan nih loh nan pianpun lama inzirtir an tum.
Mizo Hmeichhe Insuihkhawm Pawl (MHIP) Sub-Hqrs. Serchhip Conference vawi 12-na leh Silver Jubilee lawmna March 20 & 21 khan neih a ni a. Nilaini khan na ‘rorel inkhawm’ neiin, agenda hrang hrang lut zingah – Mizo hnam chimrala kan awm loh nan pianpun inzirtirna tura hma lak nise; puipunnaah hmeichhiaten puan bih uar tura inzirtir nise, tih te pawm a ni. Heng bakah hian ‘Inneihnaah puanchei bih tura hma lak ni rawh se’ tih pawh pawmin MHIP Sub-Hqrs. Serchhip office hmun nghet nei tura an hma lak chhunzawm zel nise an ti. Kum 2024 budget atan Rs. 214,600 pawm a ni bawk.
Ningani khan an kum 25 tlin, lawmna an hman chhunzawm a. Systematic Voters’ Education and Electoral Participation (SVEEP) nodal officer, DIPRO Lalnunmawii Lok Sabha inthlanpuia vote thlak theuh turin District MHIP-te hi a sawm.
MHIP Sub-Hqrs. Serchhip hi kum 1999-a din niin a hnuaiah hian MHIP Block pathum – Tawitlang, Ramlai leh East Lungdar Block a awm a; Joint MHIP chu khaw pali – Bungtlang, Thenzawl, East Lungdar leh North Vanlaiphaiah a ding bawk. MHIP Sub-Hqrs. Serchhip hnuaiah hian MHIP Branch 82 awmin member 21106 an awm mek.
Serchhip MHIP-in pianpun inzirtir lamah hma lak tum
