Mizoram Bar Association (MBA) Serchhip Welfare chuan Aizawl Judicial District-a District & Sessions judge Vanlalenmawia hnenah Serchhip-ah District & Sessions Judge a awm loh avanga harsatna an thlen.
MBA Serchhip Welfare hruaitute hian Ningania Serchhip tlawhtu Vanlalenmawia hnenah hian District & Sessions judge an awm loh avangin thubuai lian – tualthah, pawngsual, POCSO Act leh ruihhlo tam tham man kaihhnawih thubuai reng reng Aizawla ngaihtuah a ngai thin tih sawiin, hei vang hian thubuai neite chu an chungthu ngaihtuah turin Aizawl lamah hruai an tul thin a, Police leh Excise & Narcotic mite tan harsatna a awm thin bakah civil mi thuhretua koh thlengin harsatna a awm thin tih an sawi a ni.
Hemi chungchanga harsatna hi Gauhati High Court Chief Justice hnenah pawh an lo thlen tawh thu sawiin, Chief Justice hian District & Sessions Judge-a thubuai an neih zat, an chinfel zat leh thubuai ngaihtuah lai la awm zat hre turin a ti a; hei hi an khawih theih a nih loh avangin District & Sessions Judge hi hma laksak turin an ngen a ni. Hei bakah hian Serchhipa District & Sessions Judge dah a nih ngei theihna tura bawhzui sak turin an ngen bawk.
District and Sessions Judge hian Serchhipa District & Session Judge dah chu High Court thu a nih thu sawiin, harsatna la awm theite a sawi a. Chutihrual chuan tuna an harsatna tawh mek sutkian ran a nih theihna’n thla tin chawlhkar khat tal Serchhip-ah District & Session Judge an thut theihna tura hma lak tha a tih thu a sawi a ni.
Serchhipah D&S Judge dah ngen
