Zorun Events huaihawtin Thawhtanni atang khan Serchhipah International Trade Expo neih tan a ni a, district bawrhsap Paul L Khuma’n a hawng.
Bawrhsap chuan India ram hmun hrang hrang atanga mipui mamawh lei tur Serchhipa chhawpchhuah a ni chu lawmawm a tih thu a sawi a. Trade Expo buatsaihtuten market zirchianna an neihah Serchhip mipui chu fel leh inhawng tak, thawhpui nuam leh event liantham buatsaih pawha hlawhtlinpui tham nia an hmuh avanga Expo neih nan an thlang chu lawmawm a tih thu a sawi.
Serchhip mipuiin man tlawm zawka an mamawh an lei theihna tur a nih piahlamah sumdawnna bul tan tur leh sumdawng mekte tan hmelhriat neih belh zel nan hlawkthlak hle dawna a hriat thu a sawi bawk.
Trade Expo hi thla khat awh tura ruahman a ni a. Mizorama lei mai tur awm lo lehkhabu chi hrang hrang, thawmhnaw, inchhung bungrua, choka hmanrua, khawl thil, ei tur chi hrang hrang lei tur a awm a. Stall 40 siamin, Maharastra, Uttar Pradesh, West Bengal, Delhi leh a dangte atanga lokalten dawr an hawng a; Thenzawl leh Lunglei atangin dawr hawng an awm bawk.
Serchhipah Trade Expo nei
