Youth Services department leh Mizo Zirlai Pawl tangdun buatsaih ‘Youth-20 Meet on Nationalism, Patriotism & Development’ chu Thawhtanni khan Serchhipah neih a ni.
He hun hmanpuitu minister Lalchhandama Ralte chuan nationalism leh development chu kalkawp tlat tur a ni, tiin, “Ram leh hnam hmangaihna leh hmasawnna a kalkawp theihna tur chuan intodelh a tul a; taimak, tawrhchhel leh teirei peih a pawimawh,” a ti. Tunlai thiamna leh changkanna hmangin Mizo thalaite pawh khawvel turkverhah englai pawhin kan dakchhuah thei reng tawh a, hetihlai hian kan hnam thil ngaisang a, chawisang tur leh kan hnam tawng vawnghim turin tan lak a tul tih a sawi. “Kan ram leh kan hnam hi kan changkan san a thiang lo,” a ti.
India ram-in G-20 presidency a chelh chhungin India ram hmun hrang hrangah sawrkar laipuia Ministry of Youth Affairs & Sports chuan Youth-20 programme a buatsaih a. Kumin July 14 khan Y20 meet hi chief minister Zoramthanga hoin Mizorama a bul tanna hi Aizawlah neih a ni a; Champhai, Mamit, Kolasib, Saitual leh Khawzawl ah te meet hi buatsaihin, tunah Serchhipah neih leh a ni.
Serchhipa school leh college zirlaite an tel a. MZP adviser Lalhruaitluanga Chawngte chu speaker niin, Mizo nationalism tobul, nihphung dik tak leh a awmzia a sawifiah a, chutiang thinlung pu turin zirlaite a fuih.
Serchhipah Youth-20 Meet nei
