Thawhleh zan khan Italian Serie A 2024-25 khelh chhunzawm a ni a, inkhel hmuhnawm takah Napoli chuan 2-0 in mualneitu AC Milan an hneh. Napoli hian point 7 in table-ah hma an hruai fal. Thawhleh zana inkhel dangah Bologna chuan Mimualah hnehna an chang ve bawk.
Hmahruaitu Napoli hi team lian AC Milan hmachhawn turin Stadio Giuseppe Meazza-ah an leng lut a, an lenluhna muaah an khel tha hle. Milan lakah hian hma taka goal an thun bakah chawlhlawk dawn hnaihah goal an thun bawk a, point thum an hmuhpui tak goal hnihte hi chawlhlawk hmaa an thun vek a ni.
An hmahruaina tizau tura chak mamawh Napoli hian inkhel tan tirhteah an khingpuite an nawr tlang a, Chelsea atanga an lak luh Romelu Lukaku chuan inkhel ta atanga minute ngana lekah hmahruaina goal a thun nghal. Lukaku hian a chakzia leh ball a hauh natzia a lantir a, a phu ang ngeiin goal a thun. Hma takah goal an thun vangin an lehluhna mualah ngampa lehzualin an inlan a, Milan lamin goal thun tur khawpin an mikhualte an nawr tlang zo lo.
AC Milan lamin goal an thun theih loh laiin Napoli bawkin goal an thun nawn leh. Chawlhlawk dawn hnaih minute 43-naah Khvicha Kvaratskhelia chuan box pawn atangin leihrulah fuh zetin a pet goal a, an hmahruaina tizau turin an goal hnihna a thu . 2-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal thun tumin an innawr tawn nasa viau bawk. AC Milan in an si phurh sut tum viau mah se goal an thun thei lo tluan a. Napoli pawhin an hmahruaina an tihzau belh theih bik lo bawk. Inkhel hmuhnawm tak a tawp a, Napoli chuan an elpui lian lakah 2-0 in hnehna an chang zui ta a ni.
AC Milan lakah point thum hlu tak an hmuh leh tak vangin Napoli hian table-a an hmahruaina an tizau a, an hnuai chiaha awm Inter Milan aiin point 7 ngawtin an sang zawk mek. Inter Milan ai hian vawi khatin an khel tlem zawk thung. Napoli hian season tharah vawi 10 an khel tawh a, vawi riat chakin draw vawi khat an nei a, tlawm zawkah vawi khat an tang tawh bawk. Italian Serie A season kal mekah team dang zawng zawngin tlawm an nei tawh a, Juventus chiahin tlawm an la nei lo. Season thara la tlawm lo awmchhun Juventus hi point 17 hmuin pathumnaah an awm mek thung.
Thawhleh zana inkhel dangah Bolognia chuan mikhual an nihna hmun Unipol Domus-ah mualneitu Cagliari chu si hnih faiin an hneh. Bologna tan hian Riccardo Orsolini leh Jens Odgaard ten goal an thun. Inkhel dangah Lecce chuan an mikhual Hellas Verona chu 1-0 in an hneh ve bawk.
Serie A – Point 7 in Napoli an sang fal
