Session-in sawi zui hlawh leh

Assembly Session-in sawi zui a hlawh viau zel a, ni hnih lek an session pawhin sawi zui a hlawh hle.
Thawhlehni leh Nilaini-a neih Assembly Session-a sawi zui hlawh ber pakhat chu house leader leh Hachhek bialtu inchhang kha a ni awm e; anmahni tan lotute’n an sawi zui ve ve a, tan zawk nei lote pawhin an sawi zui.
House leader Lalduhoma’n PMJKV hnuaiah sorkar hmasa hun laiin work order awm lova hnathawh, minister-in kal paha hna a pek an tam avangin sorkar thar a buai niin a sawi a, Hachhek bialtu Robert Romawia Royte-in chutiang a awm chuan hrilh turin a lo ngen, helai velah hian boruak a sang ta a ni.
House leader hian “A list kan rawn buatsaih ang,” a ti a, an pahniha an inchhannaah hian “Sawma pakhat Kohhrana nuai 36 pekte pawh kha kan lawm e,” tiin a sawi.
Kum 10 chuang liam taa sawma pakhat a pek chungchang sawi a nih hian Robert Romawia Royte hian, “Nuai 36 a ni lo, nuai 51 a ni,” tiin a lo chhang. “E, lehnghala na, kan lo hre sual a nih chu, a va ropui ve!” tiin house leader-in a chhang leh; “Kohhran pawh an buai nak a nih kha!” a ti bawk.
Thawm pawh a ring a, opposition leader Lalchhandama Ralte-in house leader emaw member-te emaw mimal thil sawi lo tura insum a ngaih thu a sawi a, house leader chuan, “In tan zel a, kan tan zel a, kan ngawi reng thei bik hlei nem,” tiin hei hi a chhang.
Hemi chungchang hian sawi zui a hlawh a, Robert Romawia Royte sawma pakhat pek tam thu sawi zui leh house leader-in house-a hetiang a sawi mak an tih thu sawi an awm ve ve. A zan lamah social media-ah 2014 MP inthlana Robert Romawia Royte a din tuma tuna chief minister ni tain a campaign-puina, a fakna leh sawma pakhat a pek pawh ropui a tih thu ‘audio’ a darh zui bawk.
House leader-in RTI chhanna aiin house-a an sawi a rintlak zawk tia a sawi pawhin khel zui a hlawh a, RTI chhanna chu minister te’n official-te an enpui hman lo tiin hemi chungchang hi a sawi.
Home minister K Sapdanga leh Serlui bialtu Lalrinsanga Ralte te inchhanna chungchangin sawi zui a hlawh bawk.
Thil dang pawhin sawi zui a hlawh a, tun hma atanga session lo en thangte mak tih tur a awm leh nual. Zawhna leh chhanna hunah pawh an thil inzawh mek nena inzawm miah lo thil lo zawt an awm a, speaker-in zawh belh thei tur zat a bitukin ngaih pawimawh a hlawh thin lo. Zawh belhna hunah thil zawt aia thusawi ang zawk te pawh an awm a, an inen liam mai. Minister pakhat chu a din ve reng laiin minister dangin zawhna a lo chhansak ve ngawt bawk! Thuziak chhiar a ngai a nih pawha “Pu Speaker, i phalnain…” tia an dil phawt thinna hmunah hian dil miah lova thuziak chhiar mawlh mawlh an la awm ta zel bawk!