Session – Rilru sawina hun

March ni 13-a budget session-ah chuan minister pahnihte demand an sawiho a, member-te’n an sawi zawhah house leader-in zin report a pe chiam!
Minister-te demand sawinaah member-te’n an sawi zawhah house leader-in a hmawr a bawk thin a, chumi hma chuan eptu pawl leader a ding thin. Chumi zawhah minister-in member-te thusawi a chhang a, a demand pass turin a ngen thin. March ni 13-a minister pahnih demand an sawi pawh khan, tih dan pangngaiin member-te sawi zawhah speaker-in house leader a sawm a, Delhi-a zan khat riaka a zin chanchin sawiin rei ngial zin report a pe! Demand neitu minister sawi tur, member-te a chhanna tur te pawh a sawi khalh a, a hnu ding minister pawhin house leader-in a ‘react’ nual tawh thu a sawi.
Budget Session-in ngaihven a hlawh a, session hmasate ang bawkin mipuiin an lawm. Social media a luah a, titi pawh a siam, inhnialna pawh a chawk chhuak nasa.
Tun term-a an session hmasa ber atangin mi lawm an hlawh a, session kalphungin ngaih pawimawh a hlawh lo tih chu titi a tling.
Session-ah hian thuziak an chhiar lo a, legislator hluite sawi danin, chhiar a tul chang chu a awm; speaker an dil thin. Mi tawngkam han sawi chhawn (quote) a tul chang te pawh a awm a, chutiang an tih dawn chuan “Pu Speaker, i phalnain,” an ti phawt thin. Mizoram House-ah erawh chutiangin ngaih pawimawh a hlawh lo a ni ang, minister pahnih chuan an demand sawihona hmawr an bawkin ziah sa an chhiar char char, an department chanchin chipchiar takin an sawi.
Mahni vei zawng sawina hun atana hmang an awm a, Mizoram Liquor Prohibition (Amendment) Bill sawihonaah pawh member thenkhat chuan a bill ni lovin Mizote leh zu chungchang an ngaihdan thahnemngai em emin an sawi. Chanchinbumi pakhat chu social media lama darh nasa sa kha chutiang chu a nih a rin thu a sawi.
PC party president Vanlalruata chuan, “Kalphungin ngaih pawimawh a hlawh lo a, an debate a hniam bawk. An debate a hniam hi thil pawi a tling. Kan hriat ve phakah tun term-a an session hian term dang session a pha lo,” tiin a hmuh dan a sawi.
“Budget Session a ni a, kan ram roreltute zingah budget hre miah lo an awm tih hi ngun taka entute tan chuan hai rual a ni lo a, hre chiang lo pawh an awm,” a ti bawk.
Minister hlui pakhat pawhin session kalphungin ngaih pawimawh a hlawh loh thu a sawi a, “Dan a awm a, kalphung a awm. Chung chuan ngaih pawimawh a hlawh lo a, hriat a hun tawh,” a ti.
Tun tum session-ah hian a tuka lutluh tur bill pakhat chu a hma zan, dar 9 hnuah member-te’n an dawng a, bill putluh tur a lo ‘leak out’ vang a ni. Bill hi a hma ni thum emaw ni li-ah emaw member-te’n an sawiho theih nan an dawng thin a, finance department leh law department a paltlang hnuah council of ministers-in an thial a, chumi hnuah member-te an sem leh thin. A tuka bill putluh tur a hma zana sem khan finance department leh law department, council of ministers a paltlang em tih chu chinchang hriate zawhna a ni. Mahse he bill hi a tukah putluh a ni ta lo.
MLA hlui, minister hlui ni bawk pakhat chuan court-a thu awm lai (subjudice) hi session-ah an sawi ngai lo tih a sawi a, tun tumah chutiang sawi chhuah a ni chu pawi a tih thu a sawi.