Montreal khuaa Canadian Open khelh mekah women’s singles top seed Coco Gauff chuan set hmasa ber hloh zet chungin Veronika Kudermetova lakah 4-6 7-5 6-2 hnehna a chang hram a, awlsam lo taka fourth round lutin, a zawna a vawi ngana atan he tournament-ah hian last 16 a lut tling ta chiah a ni.
2025 French Open champion hian final 16 lamah tleirawl kum 18-a upa wildcard Victoria Mboko a tum leh dawn a, tualchhung player hian third round match dangah 1-6 3-6 6-0-in Czech Republic player hriat hlawh Marie Bouzkova a paltlang thei ngat a ni.
He Canadian tleirawl hian a career-a a tawn san ber hun world number 85 ni chungin an ram tournament a khel a, round of 16 a thlen phak tak avangin WTA ranking thar tarchhuah leh turah top 70 a kai chho ve tawh dawn a ni.
Tla langsar zingah fourth seed Mirra Andreeva telin, 28th seed McCartney Kessler chuan 7-6 6-5-in Russian hi a hnawtchhuak a, 3-6 6-3 7-6 (7-4)-a 15th seed Daria Kasatkina hnehtu Ukrainian 27th seed Marta Kostyuk a hmachhawn leh ang.
Unseeded Zhu Lin of China chu fourth round lut zingah tel teh nawlh thungin, 6-2 6-2 -in Suzan Lamen a hneh.
Toronto khawpuia men’s draw lamah Alexander Zve-rev chuan 6-7 (5-7) 6-3 6-2-a Italy player Matteo Arnaldi hnehin fourth-round tie pakhatah Francisco Cerundolo a su dawn.
He hnehna hi German tan a career-a tour-level hnehna tum 500 a chan tlinna chiah niin, a mellung thar phun chu hlawhtlinna lian a nih thu leh player tam zawk thlen phak loh a nih thu sawi chungin game 500 china duhtawk ngah mai a la tum loh thu leh hmalam pana pen zel a tum thu a sawi.
World number one hlui Daniil Medvedev erawh defending champion Alexei Popyrin ngam loin a tla thung.
Australian Popyrin hian Russian 10th seed laka 5-7 6-4 6-4 hnehna a chan hnuah fifth seed Holger Rune tum chungin fiahna hautak zawk a hmachhawn leh a ngai dawn.
Third seed Lorenzo Musetti tan tournament a tawp a, third round inkhel pakhatah 3-6 7-6 (7-4) 6-4-in 26th seed Alex Michelsen of the United States chuan a hneh.
Michelsen hian fourth round lamah a chipui American ve ve Learner Tien leh Reilly Opelka inkhela chak zawk zawk a tum leh ang.
Eighth seed Casper Ruud pawhin fourth round a luhna kawngah 7-6 6-4-in Nuno Borges a hneh a, 6-7 6-4 6-1-a Emilio Nava vawtlatu 11th seed Karen Khachanov nen an intum leh.
Set hloh chunga chak top seed Gauff
