Kolasib bialtu MLA, Assembly deputy speaker Lalfamkima chuan National Highway 54/6 huamchhunga RTP Farm leh Sethawn inkar leh Kawnpui quarry bula kawng siam mek a tlawh a, contractor chu chak zawka hna thawk turin a chah.
Deputy speaker hian Mizoram sawrkarin inkalpawhna kawngpui a ngaipawimawh a, hun reitak chhung Aizawl panna kawngpui lirthei kal velah harsatna a awm chu pawi a tih thu sawiin, hna enkawltu NHIDCL leh an hnuaia contractor-te chu mipui mamawhna hria a, hun tiam chhunga thawk zo ngei turin a chah.
NH. 54/6 huamchhung, Kolasib leh Kawnpui inkara RTP Farm leh Sethawn khaw inkar leh Kawnpui quarry bula kawng chhe zual lai, ruah a sur changa lirthei tanna thin chu NHIDCL hnuaiah contractor C Lalhluna, Aizawl chuan a thawk a, kawng chhe zual hi metre 200 ve ve, dry lean concrete (DLC) leh pavement quality concrete (PQR) in an thawk a ni. DLC hi inches 6-a chhah niin, hemi chungah hian PQR (inches 10 a chhah) in an chhung leh a, a zau zawng metre 7 tur niin, a chanve (metre 3.5) chhun mek a ni a, he hna hi July 12-a zawh hman tumin theihtawp chhuah mek a ni. Hemi hnu ah side lehlam hi thawh chhunzawm a ni ang.
Kawng chhiaah hian lirthei veivak a tangkhan loh nan leh hnathawh a buai loh nan chhun lamah contractor-in traffic duty a ruahman a, zan lamah Kolasib Traffic Police leh Kawnpui Police an in duty chhawk anga, Thingdawl YMA-in an puibawm thin dawn a ni.
Sethawn bul kawng siamtha rang turin a thawktute hrilh
