Chawlhkar kua chauh team a enkawl hman tihah Sevilla chuan an head coach chhawr lai Diego Alonso an ban fel.
Inrinni liamta Spanish La Liga inkhel pakhatah Sevilla hian sithum fai ngawtin an mikhual Getafe an hneh lo a, table-ah 16-na la luah zui tawk tawk mah se club thuneitute’n an manager lakah rinna an nghat ngam ta lo a, season thara top flight luah chhunzawm dan kawng dapin coaching staff siksawi an reltlu ta a ni.
Kum 48 mi Uru-guayan hi kumin October ni 10 mai khan head coach ni tura sengluh niin, a team thar chu ban a nih thleng khan league leh Europe-ah vawikhat mah a chakpui zo lo ve ve a, a chunga rinna han nghah zui zel ngamna chi niin a lang ta lo ve bawk a ni.
Season liamta khan Jose Luis Mendilibar-a hnuaiah Sevilla hian an record kawl lai belh-chhahin a tumsarihna atan Europa League title an sualchhuak a; tun season-ah Champions League khelin, group stage mawngphah ni chungin an tla thung.
Alonso an rawih hnua Sevilla chak awmchhun chu Copa del Rey-a division hniam zawk club an hneh ve mial kha a ni!
Uruguayan Alonso hi nikum October thla hnu lama Sevilla manager palina ni tawhin, an petchhuah hmaa league game vawiriat a khelh-puiah vawithum tlawmin, draw vawinga a neihpui a; an sporting director Victor Orta chuan thinlung na vawng vawng chunga thutlukna an siam thu a sawichhuak.
Sevilla head coach Diego Alonso an ban
