Shaboozey ‘A Bar Song (Tipsy)’ a la Hot ber

Shaboozey ‘A Bar Song (Tipsy)’ a la Hot ber
Shaboozey hla hit ‘A Bar Song (Tipsy)’ chu Billboard Hot 100 (singles) chart-ah a No.1 a, he chart-a kar 18 a No.1-na a ni ta a, hetihrual hian Gracie Abrams pawhin a vawi khat nan he chart a top 10 kai thei hla a nei ve ta bawk.
Billboard Hot 100 hi kar khat chhunga US-a hla lar dan tehna niin, chart ranking siam nan hian kar khat chhunga U.S. streaming (official audio leh official video), rdio airplay leh sales data te chu tehna pawimawh a ni.
‘A Bar Song (Tipsy)’ hian radio airplay maktaduai 69.2, streaming maktaduai 19.9 leh sales 6,000 a la nei thei a, hei hi a kar 18 nan chart-ah a No.1 pui leh ta a ni. He hla hian kar kalta khan record siamin, midang zaipui nei loah chuan he chart-a No.1 ni rei thei ber a ni tawh a, tunah chuan he chart-a No.1 ni rei ber record siamtu Lil Nas X featuring Billy Ray Cyrus ‘Old Town Road’ record, kar 19 chu a hnaih tawh hle a, kar khat dang a No.1 leh thei a nih chuan he record hi a nihrual tawh dawn a ni.
Chart No.1 hlui Lady Gaga leh Bruno Mars ‘Die With a Smile’ chu No.2-ah bawk awm lehin, Billie Eilish ‘Birds of a Feather’ chu No.3-ah bawk a la awm a, Sabrina Carpenter ‘Espresso’ pawh No.4-ah bawl a la awm a, chart No.1 hlui Teddy Swims ‘Lose Control’ pawh No.5-ah bawk a la awm.
Gracie Abrams ‘That’s So True’ chu radio airplay maktaduai 1.9, stream maktaduai 23.5 leh sales 3,000 tlingin No.13 atangin No.6-ah a invawrh a, he chart-a a hla top 10-a kai thei hmasa ber a ni. He hla hi a album ‘The Secret of Us’ atanga a single niin, a tirah No.44-ah a debut a, chuta tang cuan No.25 kaiin, chutah No.13 a kai leh a, a kar li-naah top 10 a kai ta a ni. A hmain he cart top 40-a kai thei hla pahnih a lo nei tawh bawk.
Gracie Abrams hi Taylor Swift ‘The Eras Tour’ opener-ah vawi 26 vel zet a tang tawh a, ‘Eras Tour’ avanga zaithiam lar zui ta pathumna angah pawh a chhal theih ang. Eras Tour opener Sabrina Carpenter leh Benson Boone te pawh Eras Tour-a an perform hnuah Hot 100 Top 10-a kai thei hla an lo nei zui tawh bawk a ni.
Chart No.1 hlui Post Malone ‘I Had Some Help’ featuring Morgan Wallen chu No.6 atangin No.7-ah a tawlh a, Sabrina Carpenter ‘Taste’ chu No.7 atangin No.8-ah a tawlh a, Benson Boone ‘Beautiful Things’ chu No.8 atangin No.9-ah a tawlh a, chart No.1 hlui Morgan Wallen ‘Love Somebody’ chu No.9 atangin No.10-ah a tawlh ta bawk.