Shaboozey ‘A Bar Song (Tipsy)’-in kumina No.1 ni rei record nihrual

Shaboozey ‘A Bar Song (Tipsy)’-in kumina No.1 ni rei record nihrual
Shaboozey hla hit ‘A Bar Song (Tipsy)’ chu Billboard Hot 100 (singles) chart-ah a No.1 a, he chart-a kar 16 a No.1-na niin, he chart-a hla No.1 ni rei thei ber record a nihrual. Hetihrual hian Lady Gaga leh Bruno Mars ‘Die With a Smile’ pawh No.2 kaiin, Tyler, the Creator-a’n top 10-a lang thei hla pahnih a nei bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian kar khat chhunga all-genre US streaming (official audio leh official video), radio airplay leh sales data te chu tehna pawimaw a ni.
‘A Bar Song (Tipsy)’ hian kar khat chhungin US-a stream maktaduai 22.1 leh sales 5,000 bakah radio airplay maktaduai 72.6 a la tling thei a, hei hi chart-ah a kar 16 nan a No.1 pui leh ta a, tihian kumina he chart-a No.1 ni ber ni mek Morgan Wallen ‘Last Night; record a nihrual a, kumin chauh ni loah chuan he chart-a No.1 nih rei theihah pahnihna niin, 2019-a kar 19 No.1 ni thei ‘Old Town Road’ Lil Nas X featuring Billy Ray Cyrus chiah a pha lo a, he chart-a kar 16 chin No.1 ni thei pangana a ni bawk.
Lady Gaga leh Bruno Mars ‘Die With a Smile’ chu No.4 atangin No.2-ah a insawn a, he hlain he chart-a a tawn sân ber a la ni a, he hla hi version chi thum dang an tlangzarh belh leh avangin a lar lehzual a, radio airplay maktaduai 45.3, streaming maktaduai 22.6 leh sales 16,000 a tling thei.
Billie Eilish ‘Birds of a Feather’ chu No.3-ah bawk awm lehin, Sabrina Carpenter ‘Espresso’ chu No.5 atangin No.4-ah a tawlh a, a hla dang ‘Taste’ chu No.9-a bawk a la awm.
Chart No.1 hlui Post Malone ‘I Had Some Help’ featuring Morgan Wallen chu No.6 atangin No.5-ah a insawn thar leh a, chart No.1 hlui bawk Teddy Swims ‘Lose Control’ chu No.7 atangin No.6 a kai thar leh ta bawk.
Tyler, the Creator ‘St. Chroma’ featuring Daniel Caesar chu No.7-ah a debut a, a hla dang ‘Noid’ chu No.43 atangin No.10-ah a invawrh bawk. Tyler, the Creator hian he chart top 10-a lang thei hla a vawi khat neihna niin, a vawi khatnaah top 10-ah hla hnih a nei nghal a, heng hla pahnih te hi a No.1 album ‘Chromakopia’ a hla te ve ve an ni.
Chart No.1 hlui, kar kalta chart No.1-a rawn debut Morgan Wallen ‘Love Somebody’ chu No.1 atangin No.8-a a tawlh a, ‘Love Somebody’ hi Morgan Wallen hla he chart a No.1 kai thei pathumna a ni.