Shah-a tihmingchhiaa puhnaah Gandhi-a’n thiam chang
India-a eptu party lian ber, Congress hruaitu, Rahul Gandhi-a chu mi tihhmingchhiat thubuaiah tual chhung court-in thiam a chantir.
Court-in Gandhi-a thiam a chantir hi Election Commission of India (ECI)-in nikum atanga electoral roll ennawn, special intensive revision (SIR) a kalpui kaihhnawihah Prime Minister Narendra Modi-a leh chief election commissioner (CEC) laka ram pum huapa nawrh leh duh lohna a huaihawt mek lai a ni.
Kum 56 mi, India-a huhang ngah tak, Nehru-Gandhi chhungkaw thlah kal zel leh British rorelna lak atanga India a indan hnuah hun tam zawk rorelna fawng lo chelh tawh, Congress hruaitu hlun, Gandhi-a hi Uttar Pradesh-a Sultanpur court chuan an puhnaah hian thiam a chantir a ni.
A lamtang leh thlawptute chuan thiam a chan lawm nan court atanga a chhuah rualin halpuah leh halmawi an hal a, an party flag an vai nasa hle bawk tih tual chhung TV channel-te chuan an tilang.
Gandhi-a an puhna hi kum 2018-a Uttar Pradesh state assembly inthlan laia an khingpui, BJP hruaitu, hetih laia an president ni bawk, Union Home Minister Amit Shah a sawi dan vang niin ‘tualthattuah a puh’ a ni.
BJP member-ten a thu sawi avang hian Shah-a tihmingchhiaa puhin Sultanpur khuaa court-ah an thlen a, ngaihtuah niin Thawhtanni khan thutlukna puan a ni ta a ni.
Prime Minister Modi-a chawr chhuahna, Gujarat-ah pawh Gandhi-a hi ‘Modi’ tih hming a sawi dan avangin kum 2023 khan mi tihhmingchhiat thubuai tho siamsak a ni tawh a, hemi tum phei hi chuan thiam loh chantir a ni a, parliament-a a member nihna pawh hlih a ni hman a; mahse, court sang zawngin thiam a chantir leh a ni.
Shah-a tihmingchhiaa puhnaah Gandhi-a’n thiam chang
