Union Council of Ministers siksawi tur thawm a awm mek laiin Union Home Minister Amit Shah chuan Ningani khan Rashtrapati Bhavan-ah President Droupadi Murmu-i a kawm.
Prime Minister Narendra Modi-a’n president a hmuh hnu ni hnihah Shah hian a kawm veleh a. BJP-in Rajya Sabha-ah a minister thenkhat a ruat nawn loh bakah thenkhat chu an state-a an party inrelbawlna lamah mawhphurhna an pek avangin minister thar ruat an nih rinna a awm a, hruaitu pahnihin president an lenchilh pawhin ngaihven a hlawh phah.
President pisa chuan Shah-a nena an inkawm lai thlalak chu X-ah an dah chhuak a, “Union Minister for Home Affairs & Cooperation Pu Amit Shah-a’n Rashtrapati Bhavan-ah President Droupadi Murmu-i a kawm,” an ti.
thawhlehni khan Prime Minister Modi-a chuan President Murmu-i hi a lo hmu tawh bawk a. Union Council of Ministers siksawi tumna a awm nia sawi a nih lai niin an inkawmna pawh hi hemi lam sawi hi an nih ngei rin a ni.
Kerala atanga BJP hruaitu hlun, George Kurian-a chuan tun hnaia Rajya Sabha-a a hun a tawp hnuah council of ministers atangin a bâng a. Kum 65 mi hi Minister of State for Minority Affairs a ni a, fisheries, animal husbandry leh dairying lamah pawh minister of state a ni bawk.
BJP chuan Kurian-a hi ruat nawn leh lo turin thutlukna an siam a, June 21 khan rorelna in sanga a hun hi a tawp a ni.
Minister of State for Railways Ravneet Singh-a pawh June 21-a Rajya Sabha-a a hun a tawp tawh a, BJP-in a dah nawn dawn lo va. Singh-a hi August, 2024 atang khan Rajasthan atangin Rajya Sabha member a ni a, Minister of State for Food Processing Industries hna a chelh bawk.
Union minister thenkhat pawh anmahni state-ah an pawla mawhphurhna pawimawh pek an awm nual a, hei hian ministry siksawi a awm theih rinna a tilian hle bawk.
BJP National President Nitin Nabin-a chuan May 28 khan Union Minister of State for Road transport & Highways leh Corporate Affairs Harsh Malhotra-a chu Delhi BJP hotu atan a ruat a. Nikum December thla khan Union Minister of State for Finance Pankaj Chaudhary chu BJP Uttar Pradesh unit president atan dah a ni bawk.
Shah-a leh Prime Minister Modi-a ten president an kawm a, minister thenkhat Rajya Sabha-a an hun leh party-a mawhphurhna an neih thar nena inkaihhnawih taka insiksawi a awm avangin Union Council of Ministers hi tihdanglam a nih mai rinna lian tak a awm ta a ni.
Shah-a’n president hmu, council of ministers siksawi rinna tilian
