Shakira Las Mujeres Ya No Lloran World Tour chu a la zo lo nain, Guinness World Record a siam der tawh a, Hispanic artist zinga tour sum chevel tam berna a ni. He tour hi February ni 11, 2025 kan Rio de Janeiro, Brazil-ah a kick off a, April ni 4, 2026 hian Abu Dhabi, UAE-ah a khar leh dawn a ni.
A hmaa he record siamtu chu Luis Miguel niin, ani hian Luis Miguel Tour 23-24 a neih chhungin ticket maktaduai 2.9 hralhin, dollar maktaduai 409.5 a hmuchhuak thei a, Shakira hian tuna a tour kal mekah hian dollar maktaduai 421.6 a la lut tling der tawh a, Luis Miguel record a khumna tak phei chu nikum December ni 11-a Buenos Aires-ah a show a neih khan a khum chiah tawh a, hetih lai hian dollar maktaduai 410.3 a la lut tawh a ni.
Shakira chuan record siam chu atan mellung pawimawh tak a nih thu sawiin, “Latin America leh Spain tour hlawhtling taka nei artist ropui tak tak an lo awm tawh laia record siam hi ka tan mellung pawimawh tak a ni. Ka rimawi zinkawng kum 30 ka zawh chhung hian thil tam tak ka paltlang ve tawh a, tun hun ka thleng thei hi a mak zawk hial a ni. Ka fan-te ka tana an awm tlat thin avangin ka lawm tak zet a, ka engkima engkim an ni a, an tel loin hetiang hi ka thleng dawn mia lo. Khawvela fan tha ber an ni chiang e,” a ti.
Shakira hi Guinness World Records-ah hian a mikhual tawh bik lo a, March 2023 khan DJ leh producer Bizarrap hla ‘BZRP Music Sessions Vol.53’ avangin record an siam a, Latin hla zinga YouTube-a darkar 24 chhunga entu ngah ber a nih bakah Latin hla zinga YouTube-a vawi maktaduai 100 en hlawh rang thei ber a ni a, Spotify-a Latin hla darkar 24 chhunga stream nasat ber a nih bakah Spotify-a Latin hla kar khat chhunga stream nasat ber a lo ni tawh.
Shakira Las Mujeres Ya No Lloran Tour-in record a siam
