SHC inthlan atan MNF an campaign tan MNF ruahmanah ZPM-in par a chhuang – Lalchhandama Ralte

SHC inthlan atan MNF an campaign tan
MNF ruahmanah ZPM-in par a chhuang
– Lalchhandama Ralte
Kumin November 5-a Sinlung Hills Council inthlanpui neih turah MNF party chuan Thawhlehni khan khaw hrang hrangah campaign an khuh hawng a. Sakawrdaia hmanpuitu leader of opposition Lalchhandama Ralte chuan MNF sawrkar laia ruahmanna awmsa, ZPM sawrkarin a rawn chhunzawm bak anmahni pual thil tih sawi tur an la nei lo tih a sawi.
MNF sawrkarin New Vervek atanga Tuivai inkar lirthei kal thei tawh lo chu black top-a an siamthat bakah lei dawh tumin an tender a, Covid leh thildang vangin chhangtu an awm loa, kum 2023-ah national highway double lane tura sawrkar laipuiin a puan tak avangin permanent bridge concrete dawh a ngai a, inkalpawh thuai an duh si avangin an sawrkar lai khan Bailey bridge dawh lailawk turin an ruahman a, a lei tur pawh Tuipui lei thiahna leh Mat lei thiahna phurhkhawm tum a nih laiin, sawrkar a inthlak a, sawrkar tharah chief minister-in a en a, tha tiin, hmanraw thar lei law law in hma an lak chhunzawm a, a lawmawm hle tih Tuivawl bialtu MLA hian a sawi.
Hetiang a nih lai hian MNF sawrkar chu engmah ti lo, ZPM sawrkar hmalaknaa lei dawh tur angin an sawi duh tih a sawi a ni.
Helai atanga Bagha panna kawng NH 306(A) ah puangin, Tuirial atanga Sakawrdai inkar hmun thumah MNF sawrkarin a tender a, cheng vaibelchhe 13-14 dawnin an siam mek a, bul an tan tawh tih a sawi. “Sawrkar tharah erawh MP inthlan vel vangin an la tan thei loa, hei tunah tlem tlemin bul an tan a, ZPM sawrkar thiltih an rawn ti leh mai mai,” Lalchhandama Ralte hian a ti.
MNF sawrkar hmalakna par an chhuang dawn tih sawiin, “A bul kan tan a, an rawn bawhzui a nih chuan a lawmawm. Mah se, sawrkar kal tawh engmah ti lo intih chi a ni ngai lo, chuti zawnga an rawn sawi pawhin thudik hria ang u,” a ti.
ZPM sawrkarin chhungtin thleng phak thiltih engmah an nei lo tih eader of opposition hian a sawi a. Thil engemaw zuarin, eng ang policy pawh duangin mipui lakah kawng hrang hrangin intiam mah se, pawisa an nei loa, mipui bumna’n an sawi mai mai niin a sawi.
“Rawn inzuarin, itawm takin awm mah se, mita kan hmuh leh benga kan hriat hmang hian thutlukna siam ang u. Hmar thimpui tih thin kha MNF a sawrkar khan êng kan hmu tan a, kan eng telh telh a ni,” MNF MLA hian a ti bawk.