SHC inthlan atan ZPM campaign tan Council tan sum kan dah belh hnem – Lalduhoma

SHC inthlan atan ZPM campaign tan
Council tan sum kan dah belh hnem
– Lalduhoma
Kumin November 5-a Sinlung Hills Council inthlanpui neih turah ZPM party chuan Thawhlehni khan campaign an khuh hawng a. ZPM hruaitu, chief minister Lalduhoma chuan an sawrkar hnu ah SHC tan sum tam zawk an ruahman belh tih a sawi.
Sakawrdaia campaign khuh hawngtu chief minister chuan, tunhma in hun rei tak chhung sawrkarin Hmar mipui a enkawl danah lungawi loin, ralthuam lekin hun an lo hmang tawh a, ralthuam tunga inremna thuthlung ziah a nih hnuah pawh chu inremna chu tih hlawhtlin lohin a awm reng a. Nghet taka mi rinawmlote hnung zui chu Council mipui bat niin a lang lo tih a sawi.
“Phuahchawp takin he Council hi hun rei tak a lokal tawh thin a. Chairman pawh an duh duha an thunun theih an dah thin. Sinlung Hills Council-in dan mumal tak a neih theih nan theihtawpin kan au ve thin a, chumi hnuah Rules siam niin, hun rei tak hnuah Act mumal tak kan nei ta a ni,” a ti. Tuna Mizoram sawrkar chu mipui nen tangruala an din a nih angin, SHC inthlanah pawh HPC mipui nen an tang tlang leh dawn tih a sawi a ni.
SHC tan sawrkar hmasa hunlaiin cheng nuai 150 pek a ni thin a, a beitham an tih avangin sawrkar thar chuan nuai 150 bakah nuai 190 a pek belh bakah Lok Sabha MP Pu Richard Vanlalhmangaiha’n a MP Fund atangin nuai 75 a rawn theh chhuak tawh bawk tih Lalduhoma hian a sawi.
Sawrkar thar chuan Tuivai lei siamthat hna a ngaipawimawh em em a, hmanraw thar hmangin tunah siam a ni ta tih a sawi bawk. “He lei hi ei leh bar chawkluhna kawng pawimawh tak leh kan unau Manipur-a awmte nen inkalpawhna kawng pawimawh tak a nih avangin kan ngaipawimawh a, kawng bakah zirna leh hriselna kawnga Hmar mipuiin hma an sawn zel theih nan hma lak zel kan tum. SHC-in hma a sawn a, leirem a rah zel theih nan kan candidate-te vote tling ngei turin ka ngen che u a ni,” a ti.
Suangpuilawna campaign khuh hawngtu Home minister K Sapdanga chuan, inthlanah state-a rorel mekte nen thawhona tha nei a, ngampa taka khawtlang leh Council mamawh thlen thei turin sawrkarna fawng chelh mek party thlantlin a finthlak tih a sawi a. Tun tum SHC inthlanah pawh chutiang thil chu a thlen an beisei tih a sawi.
“Thawhhona a that loh chuan hmasawnna hnuhchhuah tur a muang thin a, mipuiin kan tuar a, hruaitute tan a hrehawm thin. Hun inher mila vote kan thlak thiam ngei ka ring a, ZPM leh HPC candidate-te in lo thlantlin kan duh takzet a ni,” a ti.