Qatari banker Sheikh Jassim chuan Manchester United lei tumin hma a la nawn leh a. A tum nga nana United lei a tumna hi a hlawhtling lo a nih chuan dawr chhunzawm a tum tawh lo.
Manchester United neitu ni mek Glazer family chuan November 2022 khan United hralh phal thu an puangzar a, lei tumtute tan dilna thehluh hun chhung an hawng zui nghal bawk. Kawvela football club hlu ber dawttu ni mek United hi lei duhtu hrawl tak tak an awm a, lei tuma dawrna dawng nual mah se Glazer family in ro-khawlhna an la siam zel rih thung. United lei tum zinga langsar pahnih chu Sheikh Jassim bin Hamad Al Thani leh Sir Jim Ratcliffe te an ni.
Qatar pa hausa tawntaw Sheikh Jassim bin Hamad Al Thani hian tun hnai khan a vawi nga nan leh a tawp nan United lei dilna a thehlut leh a. United lei a dilnaah hian club in leiba a neih zawng zawng pawh rulh nghal vek a huam thu a ziak tel nghe nghe. March thlaa tarlan dangin United hian £969.6m chuang zet leiba a nei mek. Leiba ngah mah se club hlun, ropui leh hlawhtling an ni a, sum hai luhna tur an haihchham lo viau thung. United hian tunhnaiah hlawhtlinna an chan hleitheih loh vangin United tantu tam tak chuan club neitu ni mek Glazer Family te hi an duhkhawp lo viau tawh a, mi dang hnenah an thuneihna hlan chhawng a, club chhuahsan turin an nawr nasa thin hle. Neitu thar hnuaiah hmasawn a, Manchester City hmakhalh ngei tura insiam len leh an duh a, neitu thar hnuaiah hmasawn an beisei hle.
Glazer Family hian kum 2005 khan United hi £790m sengin an lei a, tuna a hlutna hi £5bn – £6bn vel zeta chhut a ni tawh thung.
Sheikh Jassim-a’n United lei tum nawn leh
