Shirui Festival chhim tum Meitei vautute lakah thubuai siam

Shirui Festival chhim tum Meitei vautute lakah thubuai siam
Manipur Police chuan Pathianni khan 5th Shirui Lily Festival chhima kal tum Meitei-te vauna tichhuaktute lakah thubuai an ziak lut.
Cyber Crime police station-ah thubuai hi ziah a ni a. “Cyber Crime PS-ah thubuai ziah luh niin a vautute man tum a ni a. Shirui Festival atan hian venhimna khauh taka kalpui niin mipui chetvelna himna tur pawh ruahman vek a ni,” tiin police chuan X-ah an tar lang.
“Mi tute nge an nih hriat loh leh pawl, Kuki mite ni ngeia hriatten Meitei-te vauin Ukhrul-a Shirui Festival chhima kal tumte vauna chi vawiin khan social media platform hrang hrangah an tichhuak a ni,” an ti bawk.
Police-in thubuai an ziah luh thu an chhuah hma hian social media-ah video tihdarh a ni a, hetah hian Kuki mite tih ni ngeia hriat invauna langin ‘Shirui Lily Festival chhimtu Meitei-te chu an dam zui lo vang’ an ti a ni.
Shirui Lily Festival hi Ukhrul district-ah Thawhlehni atanga Inrinni thleng hman tur a ni a. Imphal atanga Ukhrul inkar hi km 80 niin Kuki khua tlem a paltlang a ni.
Police chuan, “Invauna hi kan ngai thutakin kan chhui nghal a. Tun thleng hi chuan a vautu pawlte hi a tak awm lo an ni a. Tun hma lam pawhin Kuki pawlte hi hriat loh pawl anga insiamin hetiang hi an lo ti tawh thin,” an ti.
Police hian ‘venhimna kalpui dan chu ngun taka ennawna thlir a ni a, officer hlun tak takte chhawpa viltir an ni a. Himna atan vantlang pawh thawhpuiah a sawm’ tiin an sawi bawk.
Manipur Police hian Inrinni khan Kuki Students’ Organisation Delhi president lakah Shirui Lily Festival chhim tum Meitei-te a vau avangin FIR an lo ziak lut tawh bawk.
Shirui Festival hi an state flower, Shirui Lily puala hman niin hetiang pangpar hi Tangkhul Naga tamna, Ukhrul district-ah a tam a, hetah hian a pual hun pawh hman thin a ni.
Tar lan tawh thin angin Manipur-ah hian May, 2023 atanga Imphal Valley-a cheng, Meitei leh tlangrama cheng, Kuki-Zo inkara tharum thawhna thleng avangin mi 260 chuang thi an awm tawh a, mi sang tel in leh lo nei lovin an awm phah mek.
Chief minister atanga N Biren Singh-a a bân hnuah sorkar laipui chuan February 13 khan President’s Rule-ah a dah a. Kum 2027 thleng hun la nei mah se assembly pawh a titawp lailawk mek bawk.