Thawhlehni zanah sikhat faia hnufual zet chungin Barcelona chuan an mikhual FC Porto laka 2-1 hnehna changin Champions League last 16 an lut a, kum 2020-21 hnu lama he tour-nament knockout stage an chuankai leh vawikhatna a ni.
Catalan team hian khelh nga atanga point 12 hmuin Group H hmahruaitu an nihna an sawhnghet a, a vawirukna atana Europe club inelna lian ber trophy hawn an tumna kawngah group stage an pel ta phawt.
Thawhlehni zan inkhelah darkar chanve a kal chiah tihin Brazilian winger Pepe chuan ball sawtlet atangin Portuguese mihkual hmahruaina goal a thun a, mahse, mualneitu team hian rang takin an siphurh an sut a, minute hnih an khel tling leh tihah Joao Cancelo chuan Pedri chhawpsak atangin Barca goal hmasa zawk a pet lut kual ngawk.
Sikhat ve ve nei chunga chawlhlawk an hman hnu second half tir lam minute 57-ah Barcelona siphurh suttu Cancelo siamsak atangin Joao Felix chuan home team hmahruailetna goal leh Xavi Hernandez-a team chakna goal ni zui nghal a thun a; he mi hma hian Porto goalkeeper Inaki Pena chuan an lama goal lut tur th atak takin a dang mawlh mawlh a, Felix-a hmingthatna tur erawh a dang zo ta ngang lo a ni.
Match khat khelh tur la awmah Barcelona hian Group H atangin round of 16 an lut a, an hnuaia chiaha beisei la nei Porto leh Shakhtar Donetsk chuan point kua ve ve humin, team pahnih hi an game hnuhnungberah an insu dawn a, team pahnih tan inkhel pawimawh a ni ang.
He group atang hian hmahruaitu tur an la chiang lo a, tuna hmahruaitu ni mek Nou Camp club hian an match hnuhnungbera an hmachhawn tur Royal Antwerp laka point khat an hmuh leh theih chuan hmahruaitu ni hlen chungin group stage hmawr an bawk thei tawh ang.
Si phur hmasa chunga last 16 lut Barcelona
