Inrinni zan European Championship Group B match pakhat zawkah champion lai Italy chuan si phur hmasa zet chungin an thawhrim rah sengin Albania lakah 2-1 hnehna nen point thum an thawkchhuak.
Hmun danga tarlan tawh angin, Albania hian European Championship match-a goal lut rang ber hmangin defending champion an chhaihkawlh a, tan atanga second 23-na lekah Nedim Bajrami chuan rinkai lo zawk hmahruaina goal khungin, European Championship-a goal lut rang ber ni reng thin Euro 2004-a second 67-na leka Russia tan Greece laka Dmitri Kirichenko thun kha a khum ta a ni.
Dortmund khawpuia Albania goal lawm hlimna hian a daih rei ta lo a, minute 10 an khel pel hlek tihah Alessandro Bastoni chuan Lorenzo Pellegrini siamsak atangin Luciano Spalletti team siphurh sitna goal a thun a; minute nga a kal leh tihah Nicolo Barella chuan Italy hmahruailetna leh an chakna goal ni zui ta a thun a, inkhel an thunun nghet sauh bawk.
Goal hnih an thun hnuah erlet zawngin Albania an khawsa lo a, Italy-in a hma aia nghetin inkhel an thunun a, half time a nih meuh chuan 72.2% ball an chang a, shot 13 an neih laiin Albania lamin vawili. A chuh leh chaihah chungnung zawk ngial mah se second half-ah Italy lamin goal thun theihna hun remchang siamchhuah an harsat ta tlat a, an hmahruaina belhchhah turin goal an khung belh zo lo tluan.
Kawr pawl leh a var inpawlh ha tan Arsenal midfielder Jorginho leh Juventus winger Federico Chiesa-te an langsar a, men in blue and white khan goal pawh khung belh thei tur an nih laiin Albania goalkeeper Thomas Strakosha khan goal hnih aia tam a chhuah duh ta tlat lo a ni.
Albania hian hun tawp dawnah an siphurh sutna hun remchang hmu mah se Gianluigi Donnarumma chuan Rey Manaj goal tur a dansak.
Euro hnuhnungberah pawh goal lo thun tawh Nicolo Barella kha Italy player zinga European Championship pahniha goal khung thei palina chiah a ni.
Euro hnuhnungberah khan Roberto Mancini hoin Azurri khan final penalty petah England an hneh a, kumin hian manager leh squad thar nen Germany ramah an title kawl lai an chuh leh mek a, an bultannaah chak hram mah se team khawng pahnih Croatia leh Spain sut tur an la nei a, tlangsaa ngaih theih an la ni lo ang!
Inrinni game hma zawng khan major tournament-ah Albania khan goal khat chiah an la thun a, Bajrami chuan an goal hnihna a rawn khung chhunzawm ta a ni.
Si phur hmasa zet chunga chak hram champion lai Italy
