Siaha-ah Lyuva Khutla hmang

Mara Kut ropui ber Lyuva Khutla chu Zirtawpni khan Siaha District Playground-ah hman a ni.
Kut Pa BACI USA MPA executive director Elaisa Vahnie chuan Kut puanzar pawtpharhin thu a sawi a. Mara hnam, India leh Myanmar-a awm leh khawvel hmun hrang hranga awmte inpumkhat a, lungrual taka ke pen a tul tih sawiin, mahni hnam ziarang humhalh a tul thu a sawi.
Siaha district bawrhsap Lalhmunsanga Hnamte pawhin thu sawiin, Mara hnam chu Zohnahthlak zinga culture nghet tak nei, tawng leh hnam incheina pawh tha tak nei a ni a, humhalh zel tul a tih thu sawiin, hetihlai hian rilru zau tak pu chunga ram leh hnam hmasawnna atan ke pen zel turin a chah.
MADC CEM M Laikaw chuan Lyuva Khutla chu ropui zawka lawm zel tum a ni a, budget pawh tam zawk dah a ni dawn tih a sawi a. Mara ram eichhetu ruihhlo chu nasa taka doa, ruihhlo awm lohna district ni tura tan lak a nih tur thu a sawi.
Kut lawmnaah hian Siaha town chhunga Mara hmeichhe pawl – MChP branch-ten costume parade neiin, Mara thalai pawl – MTP branch hrang hrangin a rualin Sawlakia lam an entir a. Myanmar actress leh artist Fiefie bakah Mara zaithiam dang ten zaiin mipui an awi a, hnam lam chi hrang hrang entir a ni bawk.