YMA Sialhawk North Branch hruaitute chuan an branch huamchhungah ruihhlo zuar an awm lo tih an sawi a. Nikum leh kumin YMA Day inkarah YMA member zingah thi an awm lo tih an sawi bawk.
June 15 – YMA Day kha hmun dang bawkin YMA Sialhawk North Branch hian an hmang a, hmanpuitu minister B Lalchhanzova chuan, Sialhawk chu kut hnathawk nasa khua an ni a, an branch chhunga ruihhlo zuar an awm lo chu lawmawm a tih thu a sawi.
Mi tu pawh, kuthnathawka eizawng emaw zirlai emaw eng mi pawh ni ila, khawvelah eng hna mah a sang bik leh a hniam bik a awm loa, kan hma theuha tih tur awm tha takin ti ila, dikna leh rinawmna in kan nun kaihruai se, kan theihna zawn theuhah midang tan malsawmna nih a pawimawh, tiin a sawi.
Zirlaite fuihna thu sawiin, Mizote kan thluak a tha a, kan ram leh kan khua hmasawnna kawnga thui tak kan thlen theihnan zirna lamah tan lak a ngai tih a sawi. A bial chhungah zirlai 117 tlawhchhuah program siamin, lehkha zir thei chu an hun tam zawk lehkha zirna atan an hman a ngai, tia a fuih thin thu a sawi a. Sialhawk khawtlang hruaitute pawh an khawchhunga zirlaite chutianga fuih turin a chah a ni.
YMA secretary report-a a lan danin, Sialhawk North Branch member hi 570 vel an ni a, nikum leh kumin YMA Day inkarah YMA member thi an awm lo. An branch huamchhungah ruihhlo zuar an awm lo.
Sialhawkah ruihhlo zuar awm lo YMA Day inkarah member thi lo
