Siami leh Tete-i hoa Argentina tour kal tur
India women’s hockey team
Major international pahnih hmachhawn tur India women’s hockey team chuan inbuatsaihna atan Argentina tour an kalpui dawn a, captain Salima Tete hoa South America lama fehchhuak tur squad an puanah beisei lawk angin Lalremsiami a tel leh.
India women’s hockey squad khawng tak turah hian player pawimawh pahnih Deepika leh Savita pawh an kirleh tawh a, India attack leh defence khawng sawt tura ngaih a ni.
Argentina tour hi kumin kum tawp lama khelh tur World Cup leh Asian Games inbuatsaihna kal zel a ni.
Head coach Sjoerd Marijne chuan tuntuma football mai ni lo hockey thiam rama chhiar zinga mi Argentina an tlawh chhan sawifiahin, player tam zawk tana fehchhuahna hun (international exposure) siamsak an duh vang a nih thu leh team combination hrang hrang enchhin an duh vang niin a sawi.
He squad-ah hian tawnhriat ngah tawh (experienced player) leh promising talent thenkhat – Bichu Devi Kharibam tihte an inpawlhsawp nawk a ni.
Hockey game-ah captain an langsar thin a, tuntum pawh hian Salima Tete bawk chu captain banhren hreng chunga India kaihruai leh tur a ni.
Nilainia 24-member national women’s hockey squad puan takah khan hliam avanga kalbo zawk drag-flicker Deepika leh experienced goalkeeper Savita-te kohkir niin, he tour atan hian defender Jyoti leh forward Mumtaz Khan-te pawh squad-ah an kir leh ta a, India tlarhnung leh hma lam phuisui sawt tura ngaih a ni.
India hian tun April ni 13-17 chhung hian Buenos Aires khuaah mualneitu Argentina chu match li an khelhpui dawn a, head coach Marijne chuan, “He tour hi player tam zawk tana international exposure leh team khawng em em Argentina laka player-te theihna enchhinna hun remchang a nih dawn avangin kan tan a hlu hle dawn a ni.
“Squad-ah hian tawnhriat nei tawh player rual an tel piah lamah talent nei tha player la naupang zawkte tana top-level hockey awmzia dik tak hriatfiah theihna hun tha a ni dawn a, kan combination hrang hrang thukphum enchhinna hun remchang a ni tel bawk ang,” a ti.
Fit-again forward Deepika kirleh thei ta hi India team tana chanchin lawmawm niin, Argentina ramah hian India team primary drag-flicker a ni zui leh nghal dawn a ni.
A awm loh hlan khan qualifiers lamah Navneet Kaur, Manisha Chauhan, Udita leh Annu-te chuan drag-flicker nih an inchhawkkual a, tunah chuan specialist Deepika chhawr tur a awm leh thei dawn ta a, attack hrim hrimah team a pui hle dawn a ni.
Qualifiers lama inlan thei lo goalkeeper Savita comeback pawh Argentine attack khawng thei tak dang turin a tangkai hle bawk tura ngaih a ni.
Regular goalkeeper Savita awm loh zawk hlana khel tha tak Bichu Devi Kharibam pawhin squad tharah hmun a chang chhunzawm.
India Women’s Hockey Squad
Goalkeepers: Savita, Bichu Devi Kharibam.
Defenders: Nikki Pradhan, Ishika Chaudhary, Sushila Chanu Pukhrambam, Manisha Chauhan, Lalthantluangi, Jyoti, Udita.
Midfielders: Vaishnavi Vitthal Phalke, Sakshi Rana, Sunelita Toppo, Salima Tete, Neha, Deepika Soreng, Rutuja Dadaso Pisal, Ishika.
Forwards: Baljeet Kaur, Navneet Kaur, Deepika, Annu, Beauty Dungdung, Lalremsiami, Mumtaz Khan.