Siami telna India leh champ lai Japan inhnehtawk
Hangzhou, China a khelh mek Women’s Asia Cup hockey tournament 2025-ah karliamta Inrinni zan khan India chuan an match hnihnaah champion lai Japan an hmachhawn a, 2-2-in an inhnehtawk.
He inkhelah hian Japan lam chuan goal an khung hmasa a, tan atanga minute 10-naah Hariko Murayama chuan Japan goal khatna a khung a; hemi hnu hian India chuan beilet ve lehin, 2nd quarter tawp hma chiah minute 30-naah Rutuja Dadaso Pisal chuan India si phurh hi a rawn sut ve leh a ni.
3rd quarter chu khawi lam mah mahin goal khung loa an zawh hnuin 4th quarter minute 58-naah Chiko Fujibayashi chuan Japan goal hnihna a rawn thun leh a, chu goal chu hun tawp hma chiahin India forward Navneet Kaur chuan a sut ve leh thei ta hlauh a ni.
India hian an final pool B match thumna leh pool match tawpna ber tur ni nghalah vawiin, Thawhtanni hian Singapore an khel leh ang.
World number 10 India hian tournament bul an tanna inkhelah si sawmpakhat fai tehrengin Thailand an lo sawp tawh a, a dawttuah champ lai leh world number 12 ni bawk Japan inhnehtawkpui lehin, an tum leh tur Singapore lakah pawh hian rinkai zawk an ni leh mek.
He tournament-a chhuak team pariatte hi pool hnihah team pali ve vea then niin, pool hniha a sang pahnih ve ve hian Super 4s stage an khel ang a, Super 4s lama a sang pahnih hian September ni 14, tun Pathianni lo thleng turah hian final an khel dawn a ni.
Siami telna India leh champ lai Japan inhnehtawk
