Siegemund rum thaihna atanga damchhuak Sabalenka
Thawhlehni khan Wimbledon Centre Court-ah semi-final luh inchuhin world number one Aryna Sabalenka leh world number 104 Laura Siegemund an inhmachhawn a, set khatna hloh zet chungin Belarusian Sabalenka chuan 4-6, 6-2, 6-4 hnehna nen last four a lut ta zawk a ni.
Kum 37-a upa ni tawh German veteran khan amah aia kum 10 zeta naupang Sabalenka kha a barakhaih thei mai dawn niin a lang hman thuak dawn a, mahse, set hnuhnung pahnihah thahrui ngah zawk kum 27 mi Sabalenka tak tak kan hmu chhunzawm a, darkar hnih leh minute 54 zet an inbeih hnuah 13th seed Amanda Anisimova nena Inrinni final luh inchuh turin a tlang ta zawk a ni.
Major tournament hnuhnung pathuma final lut kim vek thei Sabalenka hi SW19-a champion turin rin a kai zual zel.
Quarter-final inkhel dangah American nula Anisimova chuan 6-1, 7-6(9)-a Russian Anastasia Pavlyuchenkova hnehin a career-a a vawikhatna atan Wimbledon semi-final a lut ve bawk.
Kum 34 mi ni tawh Pavlyuchenkova hnehtu kum 23 leka upa Asimova kha Court One-ah a a vahpa Jackson chuan a tawiawm a, inkhelh banah he naupang hian lawm a hlawh hle nghe nghe.
Siegemund rum thaihna atanga damchhuak Sabalenka
