State danga kal ngai lova mahni state chhung ngei atanga Mizo thalaiten hotel management an zir ve theihna tur State Institute of Hotel Management (SIHM), Bung Bangla, Aizawla din tumna chu, kum 16 zet buaipui a nih hnuah tihpuitlin theih a ni dawn ta lo niin a lang ta a.
SIHM dinna tura tourism department hmalakna kalpui a nih dan tun tum Assembly Session hnuhnung bera Public Accounts Committee-in a chhuina Report, House-a a theh luhah chuan, SIHM hi tihpuitlin theih loh tura ngaih tawh niin, infrastructure (building) te pawh outsource tumna a awm mek a ni.
Hetiang thil, hnam rohlu ni mai thei tur, pamtul mai tur hi a uiawm takzet a, state pakhat ve riang ruangin asset hlu tak ni mai tur, infrastructure engkim peihfel vek tawh a champion pui thei lo tur hi a lungchhiatthlak ang zawng pawhin sawi theih awm e.
SIHM hi 2007-a bultan kha a ni a, infrastructure dinna tur hi Ministry of Tourism-in cheng nuai 1000 a rawn tum a, infrastructure din nan cheng nuai 800 hman tur a ni a, chu chu kum hnih chhunga zawh tur a ni. A function theih hun chu sawrkarin post creation a peihfel hunah a ni dawn a, a lo berah bultan a nih atanga kum 5 hnu, 2012 atang chuan a nihna tur anga function thei tura ngaih a ni. Chuti a nih chuan, hotel management degree course hi kum thum a ni a, batch thum chuan an zirchhuak hman tawh dawn tihna a ni a; hotel management graduate Mizo thalai rual 60 tal chu kan nei hman tawh dawn tihna a ni.
Hotel Management Degree Course seat 100-ah state-in 20% quota kan nei dawn a. Hei bakah hian Diploma Course zirna seat 150 a awm dawn bawk. Degree Course chauh pawh hi chhut ta ila, kum tin Mizoram state-in seat 20 kan fill up zel phei chuan, hotel management graduate mai tur Mizo thalai 100 rual an awm hman tawh dawn tihna a ni bawk a, diploma course zirchhuakte nen phei chuan, Mizo thalai thahnem tak eizawnna Mizoram sawrkarin a siamsak tawh dawn tihna a ni.
Tuna kan ram dinhmun han thlir hi chuan, human resource development lam hi uar taka kan kalpui loh chuan, thalai lehkhathiam hna thawh tur hmu lo pung chho zel hian a tha lo zawngin nghawng a rawn nei mai ang tihte pawh a hlauhawm rum rum tawh a. Tuna SIHM pamtul mai tur anga ngaih mek pawh hi, a nihna tur anga chhawr tangkai a nih theih nan a kaihthawh leh dan zawn hram hram a duhawm hle a ni.
SIHM puitling thei lo tur hi…
