July 17, Nilaini khan LZ Juice MPL 11 round 3 khelh Tan a ni a, season tharah chak la nei lo pahnih; Sihphir Venghlun FC leh FC Bethlehem te inkhelah Sihphir Venghlun FC in 4-2 in hnehna an chang. Nilainia inkhel dangah hmahruaitu Chanmari FC chuan hnehna changin hma an hruai chhunzawm zel.
Sihphir Venghlun FC 4-2 FC Bethlehem
RG Stadium-a MPL 11 round 3 inkhel hmasa berah table hnuai lama awm pahnih Sihphir Venghlun FC leh FC Bethlehem te an inkhel a, point hmuh tuma inkhel an ni bawka inkhel hmuhnawm tak an lantir. Inkhel hmuhnawm takah hian PC Lalruatsanga goal hnih thun hmangin Sihphir Venghlun FC in hnehna an chang a, point thum hlu tak an hmu.
He inkhelah hian goal a lut hma hle a, inkhel Tan aTanga minute lina lekah Malsawmtluanga Pautu chuan Sihphir Venghlun FC hmahruaina goal a thun. Hma takah goal an thun vangin inrintawkna sang zawk nen an inlan a, chawlhlawk hmain goal an thun belh leh. Chawlhlawk dawn hnaih minute 43-naah Joseph Lalthafela chuan FC Bethlehem tan goal thunin an si phurh a sut. FC Bethlehem in an goal thun lawma an au thawm a reh fel hmain Sihphir Venghlun FC in hmahruaina goal an thun zui leh nghal zat thung. Minute 44-naah Lalawmpuia chuan hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal thum dang a luh belh leh. 2-1 a hmahruai tawh Sihphir Venghlun FC tan PC Lalruatsanga chuan minute 52-naah goal thunin an hmahruaina a tizau a. PC Lalruatsanga vek hian minute 67-naah an goal lina a thun belh zui leh a, he inkhelah hian goal hnih a thun bakah assist vawi khat a nei bawk a, Kuriz man of the match-ah thlan a ni. Si thum ngawta an hnufual hnuin FC Bethlehem in hun tawp dawn hnaiah penalty an hmu a, an si phurh an sut Then. He penalty hi Danny Zorammawia’n pet goal bawk mah se an result erawh a thlak danglam phak tawh lo thung. Inkhel hmuhnawm takah hian Siphir Venghlun FC in point thum an hmu a, FC Bethlehem in point an hmu lo chhunzawm zel.
Chanmari FC in an hmahruaina an sawh nghet
Nilaini a inkhel hnuhnung zawkah season thara chak zawn thei awmchhun Chanmari FC in Chawnpui FC lakah si hnih faiin hnehna an chang a, an hmahruaina an sawh nghet.
Inkhel hmuhnawm takah goal lut a awm theih loh reng hnuin minute 69-naah Lalhmangaihsanga chuan Chanmari FC hmahruaina goal a thun a. Minute 79-naah PC Rosangzuala chuan Chanmari FC goal hnihna a thun zui leh a, an chakna a nem nghet. Hun tawp thlengin goal dang a luh belh tawh lova, an hmahruaina sawhnghet turin Chanmari FC in 2-0 in hnehna an chang a, season tharah vawi thum chak zawn thei awmchhun an ni.
Sihphir Venghlun FC an chak ta
