Sikkim lei verha thil puakah mi 12 thi, 13 zawng mek

India hmarchhak, Sikkim-a lei verh hna thawhna hmuna boruakalhthei puak vanga hmun thenkhat chimah thawktu mi 12 vel an thi niin thuneituten an sawi.
Thawhtannia a chim atang khan mi 13 an tang a, zawn hna ngawrh taka thawh mek zel a ni.
National Disaster Response Force (NDRF) chuan lei verh chhung km 1.5 chuanga thukah a chim niin an sawi.
Lei verh hna thawh mek hi a bul lawka Teesta River atanga hydropower plant-a virmep lian chi (turbine) thlenga tui lakna tur niin Himalayan tlangdunga state-ah hian sorkar hnuaia mi, National Hydroelectric Power Corporation (NHPC)-in a hna hi a thawk mek a ni.
NHPC-in thuchhuah an siamah chuan ‘lung kara methane gas nia rin tangten puak hi siamin khu leh boruak tha lo tak a tichhuak ta’ niin an tar lang.
Sikkim sorkar pawhin chhiatna hi ‘methane gas kang’ atanga insiam niin an sawi ve bawk.
Methane hi mahnia boruakalhthei insiam, lei hnuaia rei tak awm thei a ni a. A awmna lei verh a nih hian a chhuak a, thil tek leh kang siam thei nena an intawn fuh chuan a puak zui thei thin a ni tih sorkar hotu pakhat chuan a sawi.
Lei verh hna thawh meknaah hian hmun hrang hrangah mi 27 an bung mek a, pahnih chu hima tlan chhuak theiin mi dang 25 chu an tang zui ta a ni.
“Tang 25 zing atangin ruang 12 hmuh a ni tawh a, team-in mi dang 13-te hi khawiah nge an awm tih an zawng mek zel a ni,” tiin Superintendent of Police Sonam D Bhutia chuan Nilaini tuk khan thuthar lakhawmtute a hrilh.
Police chuan thi zinga mi pasarih chu tute nge an nih an hre tawh a, pakhat chu Sikkim-a mi niin a dangte chu West Bengal, Uttarakhand leh Assam state atanga kalte an ni.
An ruang endik hnuah an thih chhan hi hriat theih a ni dawn tih thuneitute chuan an sawi bawk.
NDRF officer Mohsen Shahedi-a chuan mi dang zawn leh chhan chhuah hna thawk mek hi a la tangte awmna lai ni ngei tura rin metre 200 bialah kalpui a nih thu ANI news agency a hrilh.
Chief Minister Prem Singh Tamang-a chuan thil thleng chhui tur hian special investigation team a din tawh a. “Eng thil nge thleng leh a thlen dan hre chiang turin mi thiamte nen kan inrawn a. Kan thil hriat atangin hma lak zel a ni ang,” tiin thuthar lakhawmtute a hrilh.