Sawrkarin silai license a pek tawh chu sumdawnna ang deuha hmante a awm nia hria in enzui an tum a, chumi hma chuan license thar an pechhuak rih dawn lo tih Home minister K Sapdanga chuan a sawi.
Assembly Session-ah member Baryl Vanneihsangi zawhna chhangin minister chuan, sawrkar thar a din hnu ah Home department-in approve sa bak silai license pekchhuah ala nei lo tih a sawi a. Ralthuam a nih angin license hi uluk taka pek ngai chi a ni a, mi hriatchian mang loh hnenah license pek ngawt chu a la hun lo deuh e, tiin nghahkhawm deuh a ni tih a sawi.
“Kum hmasa lam khan silai license hi kan lo phalrai deuh a, chhinchhiah danin kum kalta khan 1296 pekchhuah niin, kum hmasa lehah 1053 pek a ni. Sawrkarin a hriat danin, silai lei mang loa a license zawrh kualte a awm a, chutih laia license pek belh zung zung hi a fel lo e, tiin, sumdawnna ang hiala leng darh vel hi chinfel phawt a ngai nia hriat a ni a. License pek sa thlithlai fel phawt hnu ah pek belh dan ngaihtuah a ni ang,” a ti.
Mi thenkhat mamawh tak tak, mahni invenna atante, loneitute thenkhatin an huan thlai venna atante silai an mamawh em em tih K Sapdanga hian sawiin, chu’ngte chu dan ngawt tum a ni chuang loa, mamawh dan azirin la pek zel tum a ni tih a sawi.
Silai license pek dan enzui tum
