Silchar Mizoten Convention Centre an mamawh thu leh Mizoram sawrkarin Silchar-ah Convention Centre an neih theihna turin hma laksak se an duh tih YMA Silchar branch hruaitute chuan an sawi.
Mizoram I&PR department ruahmana press tour-a kal MJA member-te hnenah Silchar YMA hruaitute chuan, Mizoram sawrkarin Silchar-ah ram tha tak tak, hman tangkai si loh a nei a, Mizote tana hman tangkai theih tura hma lak nise an duh tih an sawi.
Ramri buai leh thildang avanga buaina bakah tuilian avanga buainaah Silchar-a awm Mizoten hma han lak tak takna tur hmun dang tha an neih loh avangin kum tak tak chhung chu Silchar Mission Compound chu an vauchher ber a ni tawh a; Mission Compound chu Mizoram Synod enkawl ni mah se, a neitu chu Presbyterian Church of India (PCI) Assembly a nih avangin an ni lam mitmei ven a nat chang pawh a awm thin tih an sawi.
Hemi chungchanga an duhna hi kum 10 dawn Mizoram sawrkar thuneitute hnenah an thlen tawh a, tun thlenga an la hlawhtling thei lo tih Silchar YMA hruaitute hian sawiin, tuna sawrkar thar pian hnu ah chief minister hnenah pawh an thlen leh tawh a, cheng nuai hnih/khata sawrkarin bul a tansak theih chuan hnatlang pawha pum theih mai an inhuam thu an thlen tih an sawi a ni. YMA pawhin bungraw dahna tha pawh an nei lo tih an sawi bawk.
Silchar chu Mizo mipui tam takin tul hrang hrang avangin an la pan nasa a, mipui tam zawk banphak tawk a ni a, engemaw harsatna a thlen palh pawha awlsam zawka hma lak a nih theihna’n venhimna lama tha zawka thuam Convention Centre chu an mamawh tih an sawi. Chapchar Kut leh thil dang dangah pawh duhthusama tha Silchar Mizoten hmunhma an nei lo chu hrehawm an tih thu leh Convention Centre chu nei thei se chuan a chhawrtu chu Silchar Mizote mai bakah Mizoram mipui tam tak an nih tur thu an sawi.
YMA Silchar branch hruaitute hian Silchar Mizoram House pawh thawmthat a ngai nasa tih an sawi a ni.
Silchar-ah Convention Centre mamawh
