Manipur-a Zo hnahthlak, CRPF-in an kahhlumte ruang awmna Silchar-ah Nilaini tlai lam leh a zanah Zofate leh Manipur Police an innawr a, innawr nasa chu an ni lo a, thil duhawm lo a thleng zui lo tih thu dawn a ni.
Thawh\anni khan Manipur-a Jiribam district-ah Zo hnahthlak volunteer 10-te chu CRPF-in an kap hlum a, an ruang hi Silchar Medical College-ah post mortem tura lak a ni. Medical College kawtah hian Zofate leh Manipur Police hi an innawr a ni.
Thawhlehni zan khan ruang hi post mortem \an a ni a, ruang paruk an zawhin Nilaini chhuna chhunzawm turin zanlaiah an chawl. Manipur sorkarin ruang hi Mizoram kaltlang lova Silchar a\anga thlawhnaa lak an tum thu, Ministry of Home Affairs (MHA) hnena an thlen hnuah, Nilaini chhunah chhunzawm a ni ta lo.
Silchar Medical College-ah hian ruang veng turin Manipur Police an indah a, Silchar-a Zo hnahthlakte’n an \hut chilh bawk.
Silchar a\anga thu dawn danin, Manipur Police te hian ruang hi lak an tum a, a hmuna awm Zofate’n an remtih loh avangin tlai lam a\angin an innawr ta a ni. Manipur Police zinga pakhat chuan silai a kau hman a, hei hian boruak a tilum zual.
Assam Police an inrawlh a, silai kautu police chu kan hruai hrang ang tiin Zofate an thlem a, an hruai hrang ta a ni.
Police te’n \in tura an ti chungin mi 100 vel chu medical college-ah hian an tlaivar a, a tuk chhun dar 1 velah ruang hi post mortem zui a ni. Tlai dar 5 rik hma deuhin post mortem hi an zo tih thu dawn a ni.
Manipur sorkarin ruang hi thlawhnaa laka post mortem pawh Manipur-a tih a tum a, hei hi Silchar-a Zo hnahthlakte’n an remti lo a ni.
Mi 10-te ruang hi Mizoram lama phurha Churachandpur panpui tum a ni a, Mizoram chhungah hian YMA te’n lo dawnsawn an tum a ni. Chutih laiin a hma zawnga ngawih chuh Manipur sorkarin Silchar a\anga thlawhna hmanga lakluh tumin MHA an be ta a, Silchar-a Zo hnahthlakte’n hei hi an remtih loh avangin thu a chiang lo zui ta a ni. Ningani tlai lam thleng khan Churachandpur panpui dan turah thu chiang a awm lo.
Silchar-ah Zofate leh Manipur Police innawr
