Title race-a inthlurbing mek pahnihin Pathianni khan Singapore Grand Prix-ah chak zawk nih an inchuh a, hmahruaitu leh world champion ni mek Red Bull driver rawn kang chho leh tan Max Verstappen chuan hnehna chang zo lo lehin world championship kal meka a elpui lian ber ni mek Lando Norris hnung chiahah pahnihna dinhmun luahin tunhnai itnlansiak hnuhnung engemawzata a lawn phak tawh lohna podium a chuangkai ve leh ta.
McLaren F1 Team driver Norris hi season kal laia a vawithum chakna ni ve tawhin, vawisarih chaka hmahruaitu ni mek Dutch driver ropui Verstappen chu driver standing lamah la pawtthla zo em lo deuh mah se hmahruaitu pahnihte point inthlauhna hi 52 chiah a ni ta a, intlansiak vawiruk la awma point 180 hmuh tur la awm hi tunge chuh chak chak kan thlir zui dawn a ni!
British driver hriam Norris hian kartawp intlansiakah Singapore Grand Prix kha a thunun hneh hle a, a hnung chiaha thleng Verstappen nen pawh an inhlat derh dawrh khawp mai!
Chutih laiin Norris hian lap khat tlanna’na hun hmang rei lo berte point khat dawn chuan thin (extra point) erawh a chang zo ta bik lo a, Red Bull junior team Visa Cash App RB F1 Team an tih tana car khalhchhuak Australian driver Daniel Ricciardo chanpual a ni tlat.
Asia tlankawngah fawr hle mah se Norris hian Verstappen-a hmahruaina thiat tur chuan intlansiak tinah point 8.7 a hmuh tlin zat zat a ngai tawh dawn a, Dutchman a rawn thokang ve leh tawh bawk nen title race a hmuhnawm chho zel dawn e.
Singapore tlankawngah Norris-a McLaren team-mate Oscar Piastri chuan pangana atanga tlanchhuakin, lap tawp lama a pit stop lak fuh chhawrin Mercedes driver pahnih a lehpel a, lawmman semna dawhsan hniam ber a rawn luah pha a, British team tan one-two finish em erawh Australian hian a thlentir zo ta bik lo a ni.
Ferrari khalhtu Charles Leclerc pawh pakuana daih atanga tlanchhuak chungin a rawn tang na thei viau dawn a, mahse, Lewis Hamilton a lehpelh hnuah George Russell chuan Ferrari driver hi dangbetin palina a luah a; Leclerc hi panganaah thlengin, paruknaah Hamilton kan hmu a; pasarihna chu Ferrari driver Carlos Sainz a ni.
Aston Martin khalhtu Fernando Alonso chuan pit-stop period laia Haas driver Nico Hulkenberg lehpelin, German Hulkenberg bakah hian Red Bull driver Sergio Perez hmaah thlengin pariatna dinhmun a luah pha.
October ni 18-20 chhung hian Texas khawpui Austin lamah United States Grand Prix hmangin championship kal lai an chhunzawm leh dawn a ni.
Singapore-a chak nuamsa Norris tan title beiseina a sang leh sawt
