Taylor Swift-i’n Eras Tour a neih mekah Southeast Asia-ah Singapore-ah chiah show a nei dawn a,, March thla tirah Singapore National Stadium, seat 55,000 awmnaah show vawi ruk a nei dawn a, ticket zawng zawng pawh an hralh zo vek tawh. Swift hian Singapore tih loh Association of Southeast Asian Nations (ASEAN) ram dangah show a nei dawn lo a, hei hi Singapore sorkarin Taylor Swift hi ram dang show nei thei lo turin dollar maktaduai tel sengin inremna an siampui niin an sawi.
Thailand Prime Minister Srettha Thavisin chuan concert promoter Anschutz Entertainment Group (AEG) hnen atanga a thu hriat ni a sawiin, Singapore sorkar hian Taylor Swift-i’n Singapore-a show vawi ruk a neih turah hian show tin-ah dollar maktaduai 2-3 an pek belh zel dawn niin a sawi a, chuti a nih chuan show vawi rukah chuan a lo berah Singapore sorkar hian Swift hi dollar maktaduai 12 tal chu an pe dawn tihna a ni. Mahse, Swift hi ASEAN ram danga Eras Tour nei lo turin an ti ve thung a ni.
Srettha Thavisin chuan, “Hetiang hian a tih theih tih lo hre ve ila chuan show hi Thailand a nei turin kan pawt lut ngei ngei ang. Concert hian economy a chawikang nasa thei tih kan hria a ni,” tiin Bangkok-a business event-ah a sawi chhuak a ni.
Singapore sorkar chuan Singapore Tourism Board-in Eras Tour an rama neih tur hi kawng hrang hrangin a support tih an puang a, “Singaporean leh ram thenawm hnaia fans tam takin concert hi an chhim duh ngei dawn a, Singapore an pan khawm dawn a ni,” an ti a, Swift nena sum leh pai lama inremna chungchang erawh engmah an puang lo thung. Singapore-a Taylor Swift concert hian tourism sector a vawrh kang nasa dawn hle niin an ngai a ni.
Singapore sorkarin Southeast Asia ram danga Eras Tour nei lo turin Taylor Swift inremna an siampui
