Pathianni zan khan Madrid Open final khelh a ni a, World No. 1 Jannik Sinner chuan set hloh lovin Alexander Zverev a hneh. Madrid Open champion thar Sinner hian player ropui Novak Djokovic leh Rafael Nadal te record khumin, record thar a siam.
Madrid Open-ah quarter-final bak la thleng lo Jannik Sinner hi season kal mekah a chetha tluang viau a, Madrid Open ah pawh hian champion tura rinkai ber a ni. Rin lawk ang ngeiin final-a a khingpui Alexander Zverev a ngam leh viau a, minute 58 chhung lekin hnehna a chang hman.
Sinner hian an intum hnuhnung pakuaa a hneh vek Zverev lakah bul a tan tha viau a, set khatnaah break nei zawn nghalin 5-0 ngawtin hma a hruai nghal. A khingpui hian game khat la ve zauh mah se awlsam takin set khatna a la.
Awlsam taka set a lak hnuin set hnihnaah a khel tha chhunzawm a, break nei zawn lehin game hnih bak a hloh duh lova, World no. 3 Alexander Zverev lakah hian 6-1, 6-2 in hnehna a chang a, a vawi khat nan Madrid Open-ah a champion.
Sinner hi thla nga liam ta khan Paris Masters-ah a lo champion tawh a. 2026 a ATP Maters 1000 inelna pathum; Indian Wells, Miami leh Monte Carlo Masters-ahte a champion zawn hnuin Madrid Open-ah a champion zui leh bawk a. Tennis player zingah ATP Master 1000 pangaa champion zawn thei hmasa ber a ni a, vawili champion zawn thei Novak Djokovic leh Rafael Nadal te record khumin record thar duhawm tak a siam. Rome khawpuia inelnaah Sinner hi a champion leh thei a nih chuan ATP Master 1000 a vawi ruk champion zawn thei hmasa ber a ni ang a, ATP Master 1000 pakua a champion vek thei pahnihna niin ‘Golden Masters’ a puitlin chiah ang.
Tennis player zingah ‘Golden Masters’ ni thei awmchhun chu Novak Djokovic a ni a. Nole hi ATP Master pakuaah vawi hnih ngawt a champion kim hial tawh. Djokovic record pahnih chu Sinner hian a rawn thaichhe ta a. ATP Master-a chak zawn rei ber leh ATP Master 1000 pangaa champion zawn hmasa ber record chu Italian hian a siam fel tawh.
French Open 2025 chu May ni 24 atangin khelh tan a ni dawn a, Roland Gorros hi Grand Slam-a Sinner la champion lohna awmchhun a ni. French Open 2026-ah hian champion lai Carlos Alcaraz chu hliam vangin a inlan thei dawn lova, hei vang hian Sinner tan champion theihna hun tha tak a awm. French Open-ah a champion a nih chuan Grand Slam pali-ah a champion kim chiah ang a. Career Grand Slam puitlin thei mi 10 zingah a tel thar ang.
Sinner dang thei an awm lo
