US Open khelh mekah ningani khan mipa quarter-final khelh zawh a ni a, Jannik Sinner leh Jack Draper ten hnehna changin semi-final an lut. World No. 1 Sinner hian double lama a kawp ve zauh thin Jack Draper a hmachhawn zui leh dawn.
World No. 1 Jannik Sinner hian quarter-final-ah player tha tak Daniil Medvedev a tum a, fiahna hautak a hmachhawn. Sinner leh Medvedev te hi inhnehtawk viau tura ngaih an ni a, final ai maha hmuhnawm zawk ni thei hial tura ngaih an ni. Inkhel hmuhnawm leh class sang lantir ngei tura beisei ni bawk mah se beisei an phak lo va, rin aiin an inhnehtawk lo ang reng. Set an lak pawhin rin aiin an la awlsam ve ve. Sinner leh Medvedev te inkhel hi beisei phak lovin a tawp ti ila a dik ber ang.
Inkhel ngaihven hlawh takah hian Sinner-a’n bul a tan tha viau a, set khatnaah break a nei zawn nghal a, game hnih chiah hloh chungin set a la nghal. Chiang zetin set khatna hloh mah se Medvedev a insiamtha thuai a, pui zetin a kir nghal. Russian player luhlul leh fei Medvedev hian set hnihnaah vawi thum ngawt break a nei a, game khat chiah hloh chungin set a la let ve leh nghal.
Set khat ve ve an lak hnuin inkhel a hmuhnawm zui sawt chuang lo. Set thumnaah Sinner a chungnung zui leh viau a, game khat chiah hloh chungin set a la ve leh. Beisei phak lova set hmasa pathum a zawh hnuin set lina a hmuhnawm a, beisei ang a ni ve ta deuh deuh. Set linam set hmuhnawm berah hian Sinners hian break pawimawh tak a neih a chhawr tangkai a, game li hloh chunga set la zui lehin 6-2, 1-6, 6-1, 6-4 a hnehna changin semi-final a inhlangkai.
Australian Open champion Sinner hian khawng takin hma lam a pan zel a, chelh ding thei an awm lo. Semi-final-ah Jack Draper a hmachhawn leh dawn a, final lut tura rinkai zawk a ni. Sinner hmaa fiahna hautak hmachhawn tur Draper hian quarter-final-a a khingpui Alex de Minuar chu set hloh lo; 6-3, 7-5, 6-2 in a hneh a, a vawi khat nan Grand Slam semi-final a khel dawn.
Semi-final a intum tur Jannik Sinner leh Jack Draper te hi double lamah an inkawp zauh zauh tawh a, an inhrechiang dun hle tura ngaih a ni. Sinner leh Dpaper te hi mimal inelnaah vawi khat chiah an la inhmachhawn a, an intum chhun Queen’s club, London ah 2021 khan Draper zawk hian deciding set-ah hnehna a chang. Kum kal mekah Sinner a khel tha em em a, Australian Open-ah a champion hial a. US Open-ah pawh hian champion tura rinkai ber a ni mek bawk.
Sinner hmachhawn tur Draper
