Venhim hna thawktute chuan sipai lirthei anga lantira opium nia rin phurh, kg 15.35 an man a. Pathianni khan Manipur-a Senapati district-a endikna an kalpuiah a khalhtu nen an man tih an sawi.
Driver man hi Assam-a Tinsukia district-a mi a ni a. Police chuan zing dar 09:00 velah Senapati Superintendent of Police Zaib Shaikh-a kaihhruaina hnuaia Senapati Operation Team (SOT), D-78 CRPF, B-109 QAT CRPF leh 16 Assam Rifles te tanghovin T Khellen check-post-a lirthei an endik laiin an man tih an sawi.
Officer-te chuan car pakhat, registration number AS23AK 5541 nei, VIP flag post vuah leh escort lirthei tel lova tlan an en fiahnaah an man tih an sawi.
An endiknaah police-te chuan, “Lirthei chhungah hian Army Brigadier (VIP flag post leh star pakhat) insignia a awm a, a sir khatah ‘ARMY’ tia inziak leh a sir lehlamah ‘MINISTRY OF DEFENCE’ tia inziak nameplate pakhat pawh hmuh a ni bawk,” an ti.
Sipai hotu lawk tak lirthei ni si, escort awm lova a kal chu rinhlelh a nih thu police-te chuan an sawi a. An dapnaah ‘opium packet 17, kg 15.35 vela rit’ chu lirthei hnung lam ding lam kawngkhar hnuaia compartment pakhata dah an hmu ta tih an sawi.
Police hian a khalhtu emaw, a lirthei neitu emaw hi sipai a ni lo hrim hrim tih finfiah zuiin vengtute bum nan hetiang hian a ti tih an hre chhuak zui a ni.
Sipai lirthei anga cheiah opium man
