Assam Rifles te insawn chhuahna tur hmawr bawkna a hnai a, an chhuahsan ramte vantlang pawimawh atana hman a nih theih nana a humhalhna dan, “The Mizoram (Restriction on Use of Transfer Land) Act, 2002” siamthatna (amendment) chu tun Session kal mekah hian kar kalta khan neih a ni a. Revenue minister-in a sawi danin, AR luah chin chhungah hian LSC nei mimal 61 an awm a, an zinga mi pariatin an LSC te sawrkar kutah an surrender tawh a.
Ram chhuahsan humhalhna danah hian LSC neitute’n an pe kir (surrender) lo a niha lung in tantir theihna dan a awm thin a; mahse, India ram kum 75 tlin denchhenin, suahsualna leh pawikhawihna lam ni lo thil dangah, ‘lung ina intantirna dan’ chu tih tawh loh ni se tih a nih angin, intantirna dan paihin pawisa chawitira inhrem theihna turin dan hi siam that a ni ta a. Revenue minister Lalruatkima chuan, he danah hian, sipaiin an chhuahsan hunah an luah ram hi mipui tan chauhva hman tura tih a nih thu a sawi a, LSC lo neih hi khap a nih thu leh, pek kir ngei a ngaih tur thu a sawi a ni.
Hetia mi naran ngaih dan maiah chuan, ‘humhalhna dan ber a awm tawh chuan LSC pekir tura inngen tehchiam pawh a ngai tawh em ni, danin a cancell tawh chuan a tawk mai lo’m ni?’ tih zawhna a awm thei awm e. Eng pawh ni se, permanent kaihhnawih thil a nih tawh avangin document pekchhuah tawhte lak let leh ngei chu nakin hun zel thlirin tihawm tak a ni reng a. LSC surrender tura hun bituk bawhchhiate hremna ‘ni tin cheng zanga chawi’ tih dan a awm miau avangin, LSC neite tan chuan dan bawhchhiat reng a ngamawm dawn lo tihna a ni a; dan siamtuten remhre takin dan an siam hi a lawmawm hle a ni.
Dan tha tak a awm bakah, Central YMA pawhin LSC neitute hi kokhawmin thil awmzia an sawipui tawh a, LSC surrender tura an lo ngen tawhna a hlawhtling tha lo nia an hriat avangin Gauhati High Court-ah PIL an thehlut hial bawk a. Sipai chhuahsan ram hi Mizo mipuite tana thil tha leh rotling siam nan a tawp thlengin beih an tum tih an sawi a. Joint NGO Coordination Committee pawhin hun kal tawhah khan Assam Rifles ram luaha mimal ram neite chu surrender turin an lo ngen tawh bawk a.
Heti luai luaia Mizoram mipuiin an ngenna karah LSC neitute hian an la surrender duh lo a nih chuan, mipui zah lohna leh, pawi sawina anga ngaih theih hial te pawh a ni awm e. An LSC neihte hi surrender duh lo pawh ni se, hman tangkai theiha a awm zui hi a rinawm loh hle a. Sipai ram luah lai chhunga mimalin LSC lo neih kha dan kalh a ni sa tawh hrim hrim bawk nen, surrender mai hi an tan chuan thil finthlak tak a nih a rinawm.