Aizawla sipai ram luah chin chhunga LSC nei civil mi 61 zinga thenkhat chuan sawrkar ngenna ngai pawimawhin an LSC te an pe kir (surrender) tawh a. Hetih lai hian LSC nei thenkhat chuan an LSC chu ‘sipai ram luah chhung a ni lo’ tiin tan an khawh a; court lama zualko an awm bawk a. Chutih rualin thenkhat, an LSC chu ‘sipai ram luah chin chhungah a ni lo’ ti chung sia surrender an awm ve bawk a. Tun dinhmunah LSC la surrender lo hi a tam zawk an ni a, sawrkarin LSC surrender tura thlakhat hun a hawnsak chhungin an pe kir vek dawn em tih chu April ni 24 ral hnuah la hriat chauh tur a ni.
Sipai ho sawi dan chuan a tir atanga an luah chin hi acre 400 aia zau a ni a, chu chuan mipui tana an sahthlak chin heng — Chand an kahna (Chanmari) te, Khatlaa Loch Hospital te, Mizoram Police Complex te, Khatlaa Veterinary Hospital ramte leh, hnu deuhah Capital Complex te kha a huam a.
Heng an ram sahthlak zau zawng hi fel taka chhinchhiah vek a ni lo thei lo va; an sahthlak dawnin sipai ram luah chin map (drawing) atangin fel takin sahthlak a ni ngei bawk ang a. Chuti a nih chuan, ram an sahthlak bak, tuna an ram luah chin pawh fel taka drawing la awm thlap zel tur a ni bawk.
Tuna LSC nei zinga thenkhatin sipai ram chin a ni lo an tih pawh hi, sipai ram luah chin drawing nen en mila, harsa lutuk lova tihchian theih tur niawm tak a ni a. Thu inchuh, inhnialna a awm a, a tihchian theihna tur lah awmsa reng, che sawn ve chhen lo a ni bawk a, practical-in thu inchuh hi finfiah a, tihchian mai theih niin a lang.
Hetih rual hian, dan siamtu rorel khawl sang berin dan an siam hnan tawh, sipai ram luah china LSC awmte cancelled theihna dan “The Mizoram (Restriction on use of Transferred Lands) (Amendment) Act, 2023” nei kan ni a, ram dan a awm tawh chuan a lal ber tur niawm tak a ni a, court lam pawhin ram dan tlawhchhana ro an rel a rinawm.
Sipai ram luah chin tihchian…
