Sipaiten Operation Sindoor laia an ei tur petu naupang zirna tumsak dawn

Sipaiten Operation Sindoor laia an ei tur petu naupang zirna tumsak dawn
Indian Army chuan Operation Sindoor an kalpui laia Punjab thingtlang khuaa silai a puah laia sipaite hnena ei tur pe thintu mipa naupang kum 10 mi chu a zirna senso an tumsak vek dawn tih Pathianni khan an puang.
Shvan Singh-a hi indo lai khan Tara Wali khuaa sipai awmte hnenah silai ri nasa em em karah ei tur pein an awmna hmunah a kal ziah a ni.
Pakistani Army nen an inkah mawlh mawlh laiin Singh-a hian sipaite hi tui, vur, thingpui, bawnghnute leh lassai te a pe thin a ni.
A inpekna leh a huaisenna chu an chhuan em avangin Indian Army-a Golden Arrow Division chuan Singh-a zirna senso hi an tumsak dawn a ni.
Inrinnia Ferozepur Cantonment-a naupang zirna senso an tumsak tur thu an puannaah hian Lt Gen Manoj Kumar Katiyar, General Officer Commanding-in-Chief, Western Command chuan Singh-a hi chawimawina a hlan bawk.
Sipaite chuan Singh-a chanchin hian ram pumah an thiltih leh sipaite an thlawpna thin hriat hlawh ve lem lo, ‘mi huaisen fak hlawh lo’ an tih ang chi tam tak an awm thin tih a lantir thu an sawi.
Singh-a hi Mamdot, Ferozepur district-a awm an ni a, a hma pawhin a len hunah sipaia tan a châk thu a lo sawi tawh thin a. “Ka len hunah chuan sipai nih ve ka duh a, ram tana thawh ve hi ka duh a ni,” tiin May thla khan a sawi.
A pa pawhin, “Kan chhuang a, sipaite pawhin an duhsak em em a ni,” a ti a. Pawl li zirlai chauh ni mah se sipaite hnenah hian tumah rawn lovin an ei tur hi a pe ziah thin a ni.
Tara Wali khua hi Pakistan nena India inrina atanga km hnih chauhva hlaa awm a ni.
Operation Sindoor-ah khan Indian sipaite hian May 7 zing khaw var hmain Pakistan leh Pakistan-in a awp Kashmir-a mi firfiakte awmna hmun kua a bei.
A beih zingah hian Jaish-e-Mohammad awmna, Bahawalpur leh Lashkar-e-Taiba hmun, Muridke te pawh a tel a. He beihpui thlak hi April 22-a mi firfiakten Pahalgam-a mi beia mi 26 an thah phuba lakna a ni.
Indian chetna avang hian Pakistan pawh che chhuak vein ramri hula Indian sipai tanhmunte chu ni thum chhung laipui leh hmanraw dang hmangin a bei ve a ni.