Election Commission of India secretary Binod Kumar leh director Shubhra Saxena chu ni hnih cham turin Thawhtanni khan Mizoram an lo thleng a. Aizawl district-a election hotute nen Special Intensive Revision (SIR) of Electoral Roll kalpui mek hlawhtlinna tura hmalak dan thlirletin hmalak zel dan tur an sawipui nghal.
ECI director chuan SIR hi hna hautak leh fimkhur taka kalpui ngai a nih avangin, India Constitution-in a sawi ang leh Representation of the People Act 1950-in a ruat ang chu zawm turin state election official-te a chah a. Vote nei thei zawng zawng electoral roll-a telh vek an nih theihnan leh vote nei thei lo chu paih an nih theihnan a pawimawh tih a sawi.
Mizoram chu ramri zau tak nei state a nih avangin, dan loa lut (illegal migrants) leh dik lo taka thil tih (fraudulent practices) laka himna atan official-te chu fimkhur zawka hma la turin a fuih bawk.
Chief electoral officer Mizoram Garima Gupta chuan, official-te chu thawhhona tha neia inpumkhat a, a tulna apianga che chhuak tur leh BLO-te puih an ngaihna zawna pui zel turin a chah a. Mizoram-a SIR hna kalpui mek chu hlawhtling taka zawh a nih theihnan official-te duhsakna a hlan tih a sawi a ni.
Thutkhawmah hian CEO Mizoram bakah district election officer Aizawl, bawrhsap ni bawk Er. Lalhriatpuia leh Aizawl district-a ERO, AERO, BLO te leh election official dangte an tel a ni.
SIR kalpui dan vilin ECI hotu lokal
