SIR thawh hnihna draft roll-ah hming paih vbc 6.56 awm

SIR thawh hnihna draft roll-ah hming paih vbc 6.56 awm
Election Commission-in electoral roll ennawn, Special Intensive Revision (SIR) a kalpui thawh hnihna, state pakua leh union territory pathuma a kalpuia draft roll thar tihchhuah takah a hmaa vote nei mi vaibelchhe 6.56 vel, 13% dawn an hming paih an ni.
Nikuma Bihar-a SIR thawh khatna kalpuiah khan vte nei thin atanga chhutin 8.3% paih an ni.
Thawhlehni khan Uttar Pradesh-ah draft roll thar hi tihchhuah a ni a, a hmain state leh UT dang 12-ah chuan Chief Electoral Officer theuhten an lo tichhuak tawh a. SIR kalpui a ni dawn tih October 27-a puan laia vote nei vaibelchhe 50.97 awm thin chu tunah chuan vaibelchhe 44.40-ah a tla thla tawh a ni.
Draft roll tihchhuah hun tur vawi thum sawn hlat tawhna, Uttar Pradesh-ah hian vote nei hi 19% dawn, vaibelchhe 15.44 atangin vaibelchhe 12.55-ah a tlahniam a, heng zinga 14.06% hi paih awm lo leh insawn tia dah niin 1.65% chu hmun danga vote nei anga chhinchhiah niin 2.99% chu thi tawh tih an ni.
Vote neia tar lan vaibelchhe 12.55 zinga vaibelchhe 1.04 hian hriattirna an la dawng kim lo tih Chief Electoral Officer Navdeep Rinwa-a chuan a sawi a. “Heng mite hian vawiin (Thawhlehni) atangin hriattirna hi an dawng dawn a. Hetah hian March thlaa final list tihchhuah turah an tel thei ngei tih finfiahna lehkha pawimawh pawh a tel dawn a ni,” a ti.
Uttar Pradesh-ah hian sawi duh nei tan thla khat hun hawn mek a ni a, tuna draft roll tihchhuaha hming chuang ve lote pawhin an chuang thei ngei a ni tih finfiahna nen an thlen theihna hun hawn mek a ni a. Final electoral roll hi March 6-ah tihchhuah a ni dawn tih EC chuan a sawi.
EC hian a thawh hnih nan SIR hi West Bengal, Rajasthan, Goa, Lakshadweep, Puducherry, Gujarat, Tamil Nadu, Madhya Pradesh, Chhattisgarh, Andaman & Nicobar Islands, Kerala leh Uttar Pradesh-ah kalpui a nih tur thu hi October 27 khan a puang a. Nikum khan Bihar-ah a thawh khatna neih niin June atanga September thleng a awh.
Tun tuma mi hi November thla atanga kalpui tan kha niin state leh UT 12-a vote nei atanga paihte hi Booth Level Officer (BLO)-ten awm lo leh insawn, hmun dang nena vote nei kawp leh thi tawh tia an chhinchhiahte an ni.
State/ UT CEO-ten an chhinchhiahna atanga a lan dan chuan vote nei thin paih tak zinga a tam ber hi awm lo leh insawn an ni a. Uttar Pradesh-ah bik pawh hetiang hi 14.06% tlingin state pakua zinga a tam ber an ni a. Gujarat leh Tamil Nadu-ah pawh awm lo leh insawn avanga paih hi 10% chuang an awm a. A vaia hetiang avanga hming paih tamna ber chu Andaman & Nicobar Islands niin 16.72% an tling.
Kerala, West Bengal, Tamil Nadu leh Puducherry-ahte hian kumin kum chawhma lamah assembly an inthlang dawn a. Kerala-ah vote neih paih 8.64%, West Bengal-ah 7.6%, Tamil Nadu-ah 15.18% leh Puducherry-ah 10.12% an awm.
Nikuma SIR kalpuina, Bihar-ah khan draft roll tihchhuaha hming paih kha 8.31% an ni a, heta 4.59% hi awm lo leh insawn vanga paih an ni.
February-March thlaa final list tihchhuahah hian paih tak tak zat a chiang dawn a, tunah hian sawisel nei leh tel lo inziak lut thei si tan hun hawn mek a ni a. Chumi atan chuan EC pawhin lehkha pawimawh thehluh ngaite pawh a tichhuak tawh a ni.
EC hian ram pumah SIR kalpui tur hi June 24, 2025 khan a puang a, assembly inthlan hmabak hnai ber, Bihar-ah bul a tan a. Kum tin special summary revision (SSR) kalpui thin a nih tho avangin sawisel pawh a hlawh a. SIR-ah hian hun tiam chhung rei lo teah tih tur tam tak a awm avang leh mipui tan pawh lehkha thehluh tur a tam avangin sawisel a hlawh a ni.
EC thupek chhuah hi Supreme Court-ah pawh khinga petition lut pawh a tam hle a. Eptu party-te pawhin National Register of Citizens (NRC) kalpui tumna kawng khat nia ngaiin an sawisel nasa hle.
SIR kalpui tura EC-in hriattirna a chhuahah hian intensive revision hi kum 20 neih a ni tawh lo va, ram thang zel, mi pem nasa leh mi pakhat ziah luh nawn tam tak a awm tawh avangin tih ngei tul niin a sawi a. Danpui Article 326 tlawhchhanin khua leh tui dik takte chauhvin vote an nei thei tih chu tanchhanah hmangin a ni lote paih nan a tul niin a sawi a ni.