Serie A bulan tanna inkhelah Pathianni khan Hellas Verona khelmualah rinkai zawk Napoli chu 3-0 tehrengin an tlawm a, an lungngaihna belhchhah turin an star midfielder Khvicha Kvaratskhelia chuan lehlam pawl player nen an insutna lamah a khelh chhunzawm thei lo bawk.
2023 champion Napoli manager ni chunga a league match hmasaberah Antonio Conte chuan harsatna a tawk a, a thiampuipa Georgian Kvaratskhelia chu loh theih lohin half-time dawn tepah a lachhuak a; second half-ah Naples khaw team an talbuai tulh tulh.
Inkhel thawhhnihna tan atanga minute ngana lekah Dailon Livramento chuan hnai set sawt atangin mualneitu Verona hmahruaina goal khungin, minute 75-ah Napoli chhiatna belhchhah turin Daniel Mosquera chuan a through ball hmuh umlutin sihnih faia Verona hmahruaina goal a thawh ve leh.
An lama sihnih a luh hnuah pawh Napoli an insiamtha zo chuang lo a; hun pekbelhah Verona bawkin an goal thumna hlawhchhuak lehin, Napoli tlarhnung pherh hlawkpuiin Mosquera chuan he inkhela a goal hnihna a khung.
Stadio Marcantonio Bentegodi-a a team thar tlawmpuitu Antonio Conte kha Luciano Spalletti hoa 2022-23 league title an lak hnua Napoli manager palina ni tawhin, beiseina sang tak nena an sengluh tharin chiang fahrana a tlawmpui leh tak hnuah Italian coach hian fans chungah thupha a chawi chul!
Napoli kuah khan 2022-23 title lut nawlh mah se a hnu lamah an talbuai chho ta tlat a, manager an thlak sek a, chuti chung chuan season liamta khan head coach hrang thiau pathum kaihhruaina hnuaiah 10-na an ni pha chauh!
Kumin nipui thawt lai khan Francesco Calzona thlaktu atan Chelsea leh Tottenham Hotspur boss hlui Conte an senglut a, team beiseina hmasaber a tihthlawn hnuah Conte hian Sky Sports Italia kaltlangin thupha a chawi a, “Ni eng hnuaia vur tuiral ang mai kan ni. He thu ka sawi chhan hi hmangaihna nena min umzui zel thintu Neapolitan supporters laka thupha chawi kan ngaih vang a ni. Coach ka nih angin kan chaklohnaah mawh ka phur pumhlum,” a ti.
Conte hian thim karah eng lam a hawi zui a, “Kan sengluh duh zingah pakhat, pahnih, pathum, pali thlengin kan hlawhtling mai thei. Kan harsatna tawh hi kan hmachhawn ngei tur a ni a, awlsam taka chinfel zung zung chi erawh a ni lo,” tiin.
Pathianni inkhel dangah AS Roma pawhin goal thun zo lo chungin league season bul an tan a, mualneitu Cagliari nen goal awm loin an inhnehtawk.
Rome khaw club dang Lazio thung chuan hnehna lawm chungin bul an tan thei a, an khelmualah minute thumna leka si phur hmasa zawk chungin kai thar Venezia lakah 3-1 hnehna an changlet.
Sithum faia Napoli barakhaihtu Verona
