Australian tleirawl kum 17 mi Sam Sieracki chuan skydiving chungin second 28.25 chhungin Rubik’s cube a remdik thei a, Guinness World Record a siam a, skydiving chunga Rubik’s Cube rem dik rang thei ber a ni.
Sam Sieracki hian Jurien Bay chungah, van boruak sang tak, feet 14,000 vela sang atanga thlawhtheihna atanga zuang chhuakin, darkar kharah km 200 vela chaka boryaka leng vel chungin Rubik’s Cube hi a remdik thei a ni.
Sieracki chuan, “A hautak takzet a ni. Boruak thaw thawm a bengchheng a, hmaiah thliin na takin a chhem a, chuvangin lei-a Rubik’s cube rem aiin rilru sawrbing a harsa bik hle a, boruaka ka hun hman aiin leiah cube rem dik nan hian hun ka mamawh tlem daih zawk a, leiah chuan second 6.5 chhungin ka remdik thei a ni,” a ti.
A hmaa hetiang record siamtu chu US a cheng Nitin Subramanian niin, ani hian second 30.14 chhungin a rem dik thei a, a record hi Sieracki hian vawi nga a beihnaah a khum thei ta a ni.
Sam Sieracki chuan, “2017-a speed-cubing competition-a ka tel ve atangin world record siam theih inrinna ka nei a, mahse, ka rin ang ngawta awlai chu a lo ni lo, a tum nga naah ka hlawhtling thei chauh a ni. Solo skydiver nih ve hi ka duh a, chumi tur hian skydiver license nei a, mahni tawka skydiving tithei turin kum 16 ka tlin hun ka nghak a. Chuta tang chuan Jurien Bay-ah hian school chawlh apiangin skydiving turin ka kal ve thin a, tunah chuan kum hnih chhungin vawi 80 chuang ka zuang ve tawh a ni,” a ti bawk.
Skydiving chunga Rubik’s cube remdikin record siam
