Social audit resource person-te tana ni 30 chhung intuaihriamna hun National Institute of Rural Development & Panchayati Raj Hyderabad leh State Institute of Rural Development & Panchayati Raj Mizoram tangdun buatsaih chu Zirtawpni khan khar a ni.
Training kharna hmanpuitu Rural Development minister Lalruatkima chuan Mizoten social audit kan hmelhriat tanna chu ni za inhlawhna – Mahatma Gandhi National Rural Employment Guarantee Act 2005, kum 2006 tawpa a lo chhuah tan khan a ni, tiin, people’s participation, transparency leh accountability chu sawrkar tha dinna kawnga thil pawimawh pathum an ni tih a sawi.
“Social audit tha taka neih hi sawrkar tha neihna kawng pawimawh tak a ni a. Social audit hian a dawngtute hnenah public sector programme-te chu thuneihna a pe a, ruahmanna siam kawngah, a tihhlawhtlin kawngah, a hnathawh kawngah leh a endik kawngah tha takin hna a thawk a ni,” a ti.
RD department a thawktute thahnemngaihna azarah social audit pawimawhna leh thatna zirchiangin kum 2012 khan directorate hranin an lo din daih tawh a, tangkai takin Mizoram mipuiin kan chhawr mek a, hmar-chhakah a nih dan tur ang taka Social Audit Unit din hmasa ber kan ni tih Lal-ruatkima hian a sawi a ni.
“Social audit hi a pawimawh si a, heta thawk tur hian senso tlem si, tha sia kalpui dan zawngin thalai lehkhathiamte training uluk taka pek a, rawih an nih chhunga lawmman tha tak pek hi kan sum leh pai dinhmun enin a tha thawkhat viau,” RD minister hian a ti a. State thenkhat chuan thla hlawh neiin mi engemawzat an chhawr a, MGNREGS administrative cost a lo thlen that loh hunah hlawh an la mumal thei loa; hlawh atan sum taktam an hmangral a, social audit tihna tur sum an nei thei ta thin lo, tiin a sawi.
Social audit buaipui turte intuaihriam
![](https://theaizawlpost.org/wp-content/uploads/tap_logo-min-large.jpg)