Social media thu thehdarh
dan a dik lo tih finfiah
Social media lama fentanyl rui ni awma thu thehdarh chu a dik lo tih finfiah a ni.
Tunhnai khan Mizoram ami, ruihhlo ni ngeia hriat rui pahnih khawlaia an kal lai chu video-a thla laksak niin, an rui awmdan chu USA vela ruihhlo an tih thin fentanyl ti te rui awm dan nen inanga ngaih a nih thu leh, Mizoramah he ruihhlo hi a lo lut ve ta mai em ni, tia ngaihdan inziahna thu thehdarh a ni a. He thu behchhan hian midangin Mizoramah fentanyl hi rawn lut ang hiala thu thehdarh an awm bawk.
Excise & Narcotics minister Er Lalrinawma chuan thuchah siamin, khawthlang ramten an buaipui em em thin, fentanyl leh tunlai ruihhlo – New Psycho Active Substance (NPS) tunhnaia Mizorama lo lut nia sawi leh Mizo thalaite zingah a hmangsual an awm nia sawi chu rang taka chhuiin an zirchiang nghal a. He thuthang hi a diklo tih April 6 khan finfiah a ni tih a sawi.
“Tunhnaia social media-a video clip pakhata mi pahnih lo langten Fentanyl an rui nia ngaih theih tura sawi awm chu zirchiangin, anmahni ngei pawh kawm an ni a. An ni chuan he damdawi, Fentanyl hi a hming pawh an la hriat ngai loh thu leh a hmuh pawh an la hmuh ngai loh thu an sawi a, hemi ni (video-a lak an nih ni) hian heroin leh drugs dang chi thum, tualchhunga hmuh mai theih chawhpawlhin an rui tih an sawi a ni,” a ti.
Mizoram mipuiin ruihhlo do kawngah mit leh beng kan chhi tlang zel chu thil lawmawm tak a ni tih Excise & Narcotics minister hian a sawi a. Ruihhlo dona kawnga tha thawhtute tha tichak a, a tulna apianga tawiawm zel turin mipui a chah thar rualin, thil a nihna tak hrechiang hmasa loa mipui tichiai thei zawnga thu thehdarh mai loa, a zirchiang theitu leh hma la theitute hriattir hmasa zel turin mipui a ngen tih a sawi a ni.
Excise & Narcotics department hotute chuan, zawhna chhangin fentanyl hi Mizoramah ruih na’na hman tura lakluh emaw zawrh leh ti an awm an la hriat loh thu an sawi a. Ruihtheih thil chungchang sawi leh thehdarh kawngah hian fimkhur a ngaih thu sawiin, la ti ngai lo leh a hming la hre lo tan a leh a langin inhrilhhriatna tha lo tak thlen thei a nih thu te an lo sawi tawh a ni.
Social media thu thehdarh dan a dik lo tih finfiah
![](https://theaizawlpost.org/wp-content/uploads/2023/04/fact-1024x576.jpg)