SOFT LOH TUR

R.Lalfakawma Seling
Khawvêl intlansiakna kawngah hian a chak leh thei apiangte din channa leh vanneihna a nih avângin kan thiltihna apiangah mawngkaw tha nen kan beih tak tak loh chuan eng kan ang phak dawn lo. |hangtharte kan zirtirna leh kaihhruaina kawngah ‘soft loh tur’ tih thu kan sawi tam ta hle mai a, thil pawimawh tak pawh a ni. Mi tam tak hi chu theihpatawp chhuah chung pawha mual êng hmu phak kher lo tur, chutah pawh a ti tha duh lo hlei hlei emaw kan la nia. Chutih rualin pa taima, tharum ngah kan tih tam tak hi ngaihtuahna an hman thiam tawk loh avângin an hlawhtling kher lo va; hlawhtling tur chuan thawhrimna leh ngaihtuah thiamna hi a kal kawp a ngai.
Hlawhtling kan tehna pawh hi kawng hrang hrang a awm thei a. Tûnlai khawvêla hlawhtling kan tehna ber chu sum thawh chhuah tam leh tam loh hi a ni ber awm e. Sawrkhâr hna lian thawk te, sumdâwng hausa mi chunga lêngte hi mi hlawhtling kan tihte chu an ni ber. Zirna lamah master degree, doctoral degree-te hi hlawhtling china kan han chhiar ni deuh mah se, sawrkhâr hna an thawh loh va, hlawh tam tak an neih loh chuan an thiamnate pawh hmang tangkai lo, zir sâng thlawn, vânduai, thiam thlâwn anga ngaihna lian tak kan nei zel a. Sum thawh chhuah tam hi hlawhtlinna tehfunga kan hman dawn chuan Mizote zingah hian hlawhtling lo hi 95% vel chu kan ni ngei ang le.
Hriatna, thiamna kan neih a, finna tak tak kan varpawh hunah chuan ‘hlawhtling’ kan tehna pawh a la dang ang. Chutih hunah chuan sum thawk chhuak tam leh sawrkhâr hna lian thawkte hlawhtlinna kan hmuh thiam ang tho hian hla phuah thiam, thu ziak mi, kuthnathawk, pheikhawk chhe siam, mistiri leh kutthemthiam hna thawktute hlawhtlinna hringnun pawh kan la hmuhthiampui ve ngei ang.
Hlawhtlinna hi a thawk chhuak tam azâwnga kan teh dawn chuan ziak mite dinhmun hi a hniam lam, a mawngphah bâwra awm an ni ang chu. An hnathawh a ropuia a zahawm ve tehlul nen hian an thawh chhuah erawh chhungkaw tan han hnemhnanpui tham a awm lo. Lehkhabu tha ber ‘Book of the year’ a thlante meuh pawhin a ziah chhung ei bak an thawk chhuak kher awm lo asin. Ni tin chanchinbu leh chinchinbu hrang hranga thu tha leh bengvarthlak tak tak, thlirna fing leh zâu zawk min chhawp chhuahsaktute phei chuan kut hah man pawh an nei chuang law. Meng rim thlawn, ngaihtuahna sêng hah thlâwn, hun tha khawh liam thlawn han tih phal chi erawh an ni si lo. Chutih rualin thuziak mi leh hla phuahtute chuan an kutchhuakah chawlhna an hmu thin.
Kuthnathawktute hi an hnathawh a zahawm tehlul nen hian kan zah loh ber an ni lawi a. Hna hnuaihnung ber thawktuah kan ngai a, lehkha zir tha tura kan insawithaihna ber pawh a ni awm e. Ei rûkna tel lo, pamhamna tel miah lo, rinawm taka an thawh chhuah hi a zahawmin a ropui asin! Kum tluanin a sur a sa hnuaiah an bung a, thosi leh vangvat karah sadai-êk ham pherhin nuam an sa lo. A sum azâwngin an thawh chhuah tam lo mah se an thlawhhma lâkah hlimna an hmu a, a thianghlim a, vânram a kâwk deuh bik riauin a hriat nghe nghe. Lirthei thar neite hlimna tluk aia hniam zawk hauh lovin fur ruahtui lo thleng leh thlai chawrno ten hlimna a pe thin.
Kan in satu leh bungraw siamtu mistiri-te mawlh hi an pawimawh teh e. Hna pawimawh tak thawktute an nih rualin kan ngaihpawimawh leh zahte erawh an ni hauh lo. Anni awm lo se engtin nge kan awm ang? An hna a pawimawh êm êm piah lamah hian in satu mistiri-te ngat phei chu an mawhphurhna sanzia hi mi tam takin kan hre pha lo mai thei. Kan thenawmte nena kan ramri inkar thuah mawh an phur thui thei viau a ni. Mistiri ten kan thenawmte chan tur dawnpui lo va, keimahni ram chin chiah chiaha ban an phun chuan buaipui chhunzawm tur a awm duh khawp. Vantlâng ram nêk, thenawmte nêk kan tih pawh hi mistiri-te mawh a nih dan a awm thui khawp mai nia. Dik tak chuan a zâu thei anga invalh duh vek kan ni a, mistiri ten nachang an hriat loh chuan buaiin a zui thin.
Kutthemthiam hna chi hrang hrang thawktute mawlh hi an khawngaihthlak ve. An thiamna leh theihna te a hlut tehlul nen mipui kan la tlêm luatah an thiamna mil an thawk chhuak lo fo. Siam thiam viau mah se, siam tur a awm mumal loh miau chuan tih vak ngaihna a awm thei lo va; ‘sual tura thlemna’ ten a bâwm ve reng. Hna thawh tur a tlem a, sum mamawhna a san si chuan a part thlak ngai lo thlaksak, thlak nia insawia thlak si lo ang thlengin awm theih a ni. Pheikhawk chhe siam thiam te, nihliap chhe siam thiam, gas stove siam thiamte hi mamawh hunah chuan an hlu êm êm vek mai a ni.
Mizoram hi a zîmin mihring kan tlêm a, sumdawnna leh eizawnna kawngah a nghei lo tawka tih dan dan a la awm. Chutih rualin mihring kan tlêm avâng tak hian state dang leh mihring tamna hmuna sumdâwnna leh eizawnna kawng hrang hrang an kalpui ang kan ti ve thei vek lo thung. Bul tan ve hluai a, a dâwrtu lam awm mumal leh si loh avânga tawp leh ta mai pawh tam tak kan awm tawh awm e. Chuvângin hmalakna kawng hrang hrangah a thlîr thiam, hmathlîr nei tha apiangte vanneihna khawvêl pawh a ni zel dawn a ni.
Thiamna leh finna kan zawnna kawngah pawh hman tlak ni tura tihtakzeta beih a ngai tawh. Pawl sawn tura zirlai pass a pawimawh êm êm rualin ngaihtuah thiamna tak tak man pha lo, vaki tawng thei ang chauha mahni zirlai thiamte hmakhua chu a thim tual tual ta. Sawrkhâr hna a vâng tial tial a, mahni kawng dap thiam, ruahmanna siam thiamte an dingchang chho ta zel e. Mi thiamna leh theihna chauh thlir lovin mahni chem kalna lam ngaihtuah chunga hmalam hun atan inbuatsaih a ngai.
Heng kan sawi tak tlem tê atang pawh hian zahawmna hi kan hnathawh a pawimawh leh pawimawh lovah a innghat ngawt lo tih a chiang mai a, hei hi leilung dan pawh a nih hi. Chutih rualin zahawmna hi kan sum thawh chhuah tam leh kan hnathawh a len vâng ngawta neih theih a ni bik lo. Kan sum deh chhuah te, kan thiamna leh theihnate thenawm khawvêngten a zar an zo ve loh chuan mihring hi a lo hlut loh ve theih khawp a. Officer lian, sumdawng hausa thenkhat aia civil zurui kan tihte khawtlâng tana an tangkai zawk dan pawh sawi tur a tam thei ang.
Taima, lehkha thiam, chak nih ngawt hi tunlaiah a tawk ta lo. Mahni chakna leh theihna puntir a, ngaihtuahna fing tak kan hman loh chuan a hlawh pawh kan hlawhchham phak lovang tih hlauhawmin. A bikin mipate kan pawimawh zual a, hnam dang leh ram dangte hmasawnzia ngaihtuahin helaia lo tuai zâw zâw hman pawh kan ni lo ve. Pa takin khawvêl hi hmachhawn ngam ila, mipa leh nghalchang chu kalna lam apiangah hawk dawt dawt mai tur a ni ngai e.