Somalia-a thihchilha sipaia intlar beihna mi tam tak thi

Somalia-a thihchilha sipaia intlar beihna mi tam tak thi
Somalia khawpui, Mogadishu-a sipai lakna hmunah thihchilh bomb tihpuahah mi eng emaw zat an thi.
Thihchilhtu hian Pathiannia thalaite sipaia luh tuma Damanyo base tuala an intlar chu a bitum a, mi 13 vel thi an awm niin a hmutute thu sawi Associated Press news agency-in a tar lang.
“Ring takin a puak a, mite chu hawi zawng hrang hrangin an tlanchhe zui nghal a. Ruangte chu hmun tinah a awm a ni,” tiin a hmutu, tuk-tuk driver Abdulkadir Hassan Mohamed chuan AP a hrilh.
Eng pawl mahin an tihah an la chhal lo.
Rawlthar rualte base luhna gate-a an intlar laiin thihchilhtu hian a bomb pai hi a tipuak niin hmutute chuan Reuters an hrilh bawk.
Abdisalan Mohamed-a chuan ‘bus-a kan tlan pelh lai pawhin rawlthar za rual’ an awm niin a sawi bawk.
“Beng tingawng rum rum khawpa ring puak ri a lo awm a, mei khuin a bawh nghal a. Thi leh hliam pawh kan hmu zui hlei thei lo,” a ti.
Thil thlenna hmunah hian pheikawk leh thihchilhtu ruang pawh hmuh theih a ni a. Sipai damdawi ina damdawi thiamte chuan hliam tuar 30 vel an dawn thu leh mi paruk chu an thih zui thu an sawi.
Thuneitu pakhat chuan Anadolu news agency hnenah mi 11 vel thi an awm niin a hrilh thung.
Sorkar chuan thil thlenna hmun hi tlawh theih loh turin a khar nghal.
Kum 2023 phawh khan Damanyo ep chiaha awm, Jale Siyad base-ah thihchilh bomb tihpuah niin sipai 25 an lo thi tawh bawk.
Inrinniah khan Battalion 26 commander Colonel Abdirahmaan Hujaale-a chu Hiiran region-ah thah a lo ni tawh bawk a, tual chhung chanchinbute chuan al-Shabab firfiak pawlin sorkar leh venhim hna thawktute beih tumin thapui an thawh thar nia an sawi lai mek a ni.
Al-Shabab hi Somali sorkar nen kum 20 dawn indo tawh niin sorkar mi pawimawh leh sipai an bei nasa hle.